मुंबई, दि. ७ एप्रिल २०२५ – पर्यटनासाठी प्रसिद्ध असलेल्या रत्नागिरी जिल्ह्यातील सागरी किनाऱ्यावर पर्यटकांच्या सोयीसाठी आता सेल्फ क्लिनिंग इको टॉयलेट्स उपलब्ध होणार आहेत. कोकण ग्रामीण पर्यटन विकास योजनेअंतर्गत रत्नागिरीच्या समुद्रकिनाऱ्यावरील ६ ठिकाणी सेल्फ क्लिनिंग इको टॉयलेट्स आणि चेंजिंग रूम्स बांधण्याचे काम लवकरच सुरू होणार आहे. यापैकी मांडवी बीच येथील सेल्फ क्लिनिंग इको टॉयलेट युनिटचे उद्घाटन भाजपाचे कार्यकारी अध्यक्ष आणि आमदार रविंद्र चव्हाण यांच्या हस्ते ९ एप्रिल २०२५ रोजी सायंकाळी होणार आहे. विशेष म्हणजे हे युनिट रविंद्र चव्हाण यांनी स्वखर्चाने बांधले आहे.
५ कोटींचा निधी मंजूर, १३ युनिट्सची सुविधा
रविंद्र चव्हाण यांच्या प्रयत्नांमुळे ग्रामविकास मंत्री जयकुमार गोरे यांनी रत्नागिरीच्या समुद्रकिनाऱ्यावरील सेल्फ क्लिनिंग इको टॉयलेट्स आणि चेंजिंग रूम्सच्या एकूण १३ युनिट्ससाठी ५ कोटी रुपयांचा निधी उपलब्ध करून दिला आहे. यामध्ये बायो डायजेस्टर तंत्रज्ञानाचा वापर करणारी १३ इको टॉयलेट युनिट्स आणि १३ चेंजिंग रूम्स यांचा समावेश आहे. या सुविधा भाट्ये बीच, गणपतीपुळे बीच, गणेशगुळे बीच, वेळणेश्वर बीच, लाडघर बीच आणि मुरुड बीच या ठिकाणी उभारण्यात येणार आहेत.
पर्यटकांच्या सोयीला प्राधान्य
कोकणातील समुद्रकिनारे हे पर्यटकांचे प्रमुख आकर्षण आहेत. दररोज हजारो पर्यटक या किनाऱ्यांना भेट देतात. मात्र, शौचालय आणि चेंजिंग रूम्सच्या अभावामुळे त्यांची गैरसोय होत होती. ही समस्या सोडवण्यासाठी भाजपाच्या दक्षिण रत्नागिरी महिला मोर्चाच्या जिल्हाध्यक्षा वर्षा ढेकणे, प्रदेश सचिव शिल्पा मराठे आणि जिल्हाध्यक्ष राजेश सावंत यांनी रविंद्र चव्हाण यांच्याकडे इको टॉयलेट्सची मागणी केली होती. या मागणीला यश आले असून, आता पर्यटकांना मूलभूत सुविधांचा लाभ घेता येणार आहे.
कोकणातील पर्यटनाला चालना
या प्रकल्पामुळे कोकणातील ग्रामीण पर्यटनाला चालना मिळेल आणि स्थानिक अर्थव्यवस्थेला बळकटी येईल, अशी अपेक्षा आहे. रविंद्र चव्हाण यांनी या सुविधांसाठी सातत्याने पाठपुरावा केला. त्यांच्या प्रयत्नांना राज्यमंत्री योगेश कदम यांचेही सहकार्य लाभले. मांडवी बीचवरील युनिटच्या उद्घाटनानंतर इतर ठिकाणच्या सुविधांचे कामही लवकरच सुरू होणार आहे.
ठिकाण आणि युनिट्सचे तपशील
भाट्ये बीच, रत्नागिरी: २ टॉयलेट युनिट्स, २ चेंजिंग रूम्स
गणपतीपुळे बीच, रत्नागिरी: २ टॉयलेट युनिट्स, २ चेंजिंग रूम्स
गणेशगुळे बीच, रत्नागिरी: १ टॉयलेट युनिट, १ चेंजिंग रूम
वेळणेश्वर बीच, गुहागर: १ टॉयलेट युनिट, १ चेंजिंग रूम
लाडघर बीच, दापोली: १ टॉयलेट युनिट, १ चेंजिंग रूम
मुरुड बीच, दापोली: २ टॉयलेट युनिट्स, २ चेंजिंग रूम्स
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:58 07-04-2025
