रत्नागिरी, २८ एप्रिल २०२५ : रत्नागिरी शहरातील ऐतिहासिक पतितपावन मंदिरात भजनास अटकाव केल्याने मोठी खळबळ उडाली आहे. मंदिराचे विश्वस्त प्रदीप चंद्रकांत उर्फ बाबा परुळेकर यांनी ज्येष्ठ भजनी बुवांना मंदिरात प्रवेश नाकारून भजन करण्यास मज्जाव केल्याचा आरोप करण्यात आला आहे. यामुळे संतप्त झालेल्या भजनी बुवांनी रत्नागिरी जिल्हा पोलीस अधीक्षकांकडे कायदेशीर तक्रार दाखल केली आहे.
काय आहे प्रकरण?
२६ एप्रिल २०२५ रोजी सायंकाळी ७ वाजता बहुजन समाजातर्फे पतितपावन मंदिरात भजनाचा कार्यक्रम आयोजित करण्यात आला होता. याबाबत मंदिर व्यवस्थापनाला २५ मार्च २०२५ रोजी पत्राद्वारे कळवण्यात आले होते. त्यानुसार, २७ मार्च २०२५ रोजी शिवरात्रीला सायंकाळी ७ ते ८ या वेळेत भजनाचा कार्यक्रम यशस्वीपणे पार पडला. मात्र, २६ एप्रिल रोजी भजनी बुवा सुरेंद्र यशवंत घुडे, संजय धाकू मेस्त्री, कौस्तुभ नागवेकर, सुदेश भरत नागवेकर, मनोज भाटकर, जयवंत बोरकर आणि इतर ज्येष्ठ भजनी बुवांनी हार्मोनियम, टाळ, पखवाज, मृदंग आदी साहित्यासह मंदिरात प्रवेश केला असता, बाबा परुळेकर यांनी त्यांना अटकाव केला. “हे मंदिर आमचे आहे, तुम्ही येथे भजन करू शकत नाही,” असे सांगत त्यांनी भजनी बुवांना मंदिरात प्रवेश नाकारला असे भजनी बुवांनी पोलिसांना दिलेल्या निवेदनात म्हटले आहे.
भजनी बुवांचा आक्षेप
या घटनेने भजनी बुवांच्या धार्मिक भावना दुखावल्या असून, त्यांनी बाबा परुळेकर यांच्यावर मानहानीचा आरोप केला आहे. ८६ वर्षीय जयवंत बुवा बोरकर यांनी सांगितले, “माझ्या ६३ वर्षांच्या भजन सेवेत मंदिरातून भजनी बुवांना बाहेर जाण्यास सांगण्याची ही पहिलीच वेळ आहे. असे कधीच कुठे ऐकले नव्हते, ते आज अनुभवायला मिळाले.” भजनी बुवांनी आपल्या तक्रारीत म्हटले आहे की, बाबा परुळेकर यांनी बहुजन समाजातील ज्येष्ठांना मंदिरात प्रवेश नाकारून त्यांचा अपमान केला आहे.
पतितपावन मंदिराचा ऐतिहासिक वारसा
पतितपावन मंदिर हे स्वातंत्र्यपूर्व काळात दानशूर भक्तीभूषण भागोजीशेठ कीर यांनी स्वखर्चाने बांधलेले मंदिर आहे, जे हिंदू धर्मातील सर्व स्पृश्य-अस्पृश्यांसाठी खुले करण्यात आले होते. स्वातंत्र्यवीर सावरकर यांच्या सूचनेनुसार, भागोजीशेठ कीर यांनी २० गुंठे जमीन विकत घेऊन त्या काळात दीड लाख रुपये खर्चून मंदिर बांधले. मंदिरातील लक्ष्मी-नारायण मूर्तीची प्रतिष्ठापना सावरकरांनी कीर दांपत्यांच्या हस्ते करवून घेतली होती. बहुजन समाजाच्या हातून मूर्ती प्रतिष्ठापना होण्याची ही देशातील पहिली घटना होती, ज्याची दखल लंडनच्या वृत्तपत्रांनीही घेतली होती.
पोलिसात तक्रार दाखल
भजनी बुवांनी बाबा परुळेकर यांच्याविरोधात रत्नागिरी जिल्हा पोलीस अधीक्षकांकडे लेखी तक्रार दाखल केली आहे. त्यांनी मंदिरात प्रवेश नाकारणे आणि भजनास अटकाव करणे यामुळे धार्मिक भावना दुखावल्याचा आरोप केला आहे. तक्रारीत त्यांनी बाबा परुळेकर यांच्यावर कायदेशीर कारवाईची मागणी केली आहे. पोलिसांनी या प्रकरणाची चौकशी सुरू केली असून, लवकरच याबाबत निर्णय घेतला जाईल, अशी माहिती सूत्रांनी दिली.
सामाजिक प्रतिक्रिया
या घटनेमुळे रत्नागिरी शहरात तीव्र संताप व्यक्त होत आहे. स्थानिक नागरिक आणि बहुजन समाजातील नेत्यांनी या प्रकरणी तीव्र नाराजी व्यक्त केली आहे. “पतितपावन मंदिर हे सर्वांसाठी खुले आहे. कोणालाही प्रवेश नाकारणे हा मंदिराच्या उद्देशालाच हरताळ फासणारा प्रकार आहे,” असे एका स्थानिक नागरिकाने सांगितले. सामाजिक कार्यकर्त्यांनीही या प्रकरणी पोलिसांना त्वरित कारवाई करण्याचे आवाहन केले आहे.
पुढे काय?
पतितपावन मंदिरातील हा वाद रत्नागिरीसह संपूर्ण महाराष्ट्रात चर्चेचा विषय बनला आहे. पोलिस या प्रकरणाची सखोल चौकशी करत असून, यामुळे सामाजिक तणाव निर्माण होण्याची शक्यता आहे. या घटनेबाबत आम्ही बाबा परुळेकर यांच्याशी संपर्क साधला असता मी आत्ता याबाबत काहीही बोलणार नाही, इतर विश्वस्थांशी चर्चा करून आपणाला कळवीन असे सांगितले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:24 28-04-2025
