चिपळूण : चिपळूण ज्येष्ठ नागरिक संघाचा एप्रिल महिन्यातील मासिक स्नेहमेळावा नुकताच संघाच्या कार्यालयात उत्साहात पार पडला. संघाचे उपाध्यक्ष सुरेश जाधव यांनी कार्यक्रमाचे अध्यक्षस्थान भूषवले.
यावेळी मंचावर सचिव रत्नमाला कळंबटे, कोषाध्यक्ष विजय बापट आणि अशोक भुस्कुटे उपस्थित होते. कार्यक्रमाला प्रमुख पाहुणे म्हणून सारस्वत बँकेचे व्यवस्थापक श्री. चांदोरकर आणि सहायक अधिकारी श्री. सुर्वे यांनी हजेरी लावली. अध्यक्ष सुरेश जाधव यांनी उपस्थितांचे स्वागत केले.
सुरुवातीला, काश्मीरमधील पेहलगाम येथे झालेल्या दहशतवादी हल्ल्याचा तीव्र निषेध नोंदवण्यात आला. या दुर्घटनेतील मृतांना तसेच संघाचे दिवंगत सदस्य वारे गुरुजी आणि शुभांगी वेस्वीकर यांना भावपूर्ण श्रद्धांजली अर्पण करण्यात आली. त्यानंतर, संघाचे सदस्य अशोक भुस्कुटे यांची दिव्यांग समन्वय समितीच्या अध्यक्षपदी निवड झाल्याबद्दल त्यांचा विशेष सन्मान करण्यात आला.
कार्यक्रमादरम्यान, एप्रिल महिन्यात वाढदिवस असलेल्या सभासदांना गुलाबपुष्प देऊन, त्यांचे औक्षण करण्यात आले आणि केक कापून त्यांना शुभेच्छा देण्यात आल्या. या आनंददायी सोहळ्याचे नियोजन सौ. नीला पेंडसे, मंजिरी नरवणे आणि अंजली गोंधळेकर यांनी चोखपणे केले होते.
प्रमुख पाहुणे सारस्वत बँकेचे व्यवस्थापक श्री. चांदोरकर यांनी आपल्या मार्गदर्शनात बँकेच्या विविध योजनांची माहिती दिली. तसेच, त्यांनी ज्येष्ठ नागरिकांना डिजिटल माध्यमांद्वारे होणाऱ्या फसवणुकीपासून सावध राहण्याचे महत्त्वपूर्ण आवाहन केले. यानंतर बळवंत डंबे आणि अपर्णा कांबळे यांनी आपले विचार व्यक्त केले.
विजयालक्ष्मी भोसले यांच्या कीर्तन पूर्वरंगाने उपस्थितांना मंत्रमुग्ध केले. माधवी वैद्य यांनी जेवणासंदर्भातील पत्रिका वाचली, तर एका सभासदाने स्वरचित कवितेचे वाचन केले. सौ. नीला पेंडसे, संभाजी ढवण आणि बळवंत डंबे यांनी संघाला उदार देणगी दिली.
या स्नेहमेळाव्यात एकूण ४८ सभासदांनी सक्रिय सहभाग घेतला. सारस्वत बँकेच्या सौजन्याने प्रत्येक सदस्याला एक डायरी भेट म्हणून देण्यात आली. उन्हाळ्याची तीव्रता लक्षात घेता, अल्पोपाहारात पारंपरिक आंबा डाळ आणि थंडगार पन्ह्याचा समावेश करण्यात आला होता, ज्याची सर्वांनी चव घेतली.
हा कार्यक्रम यशस्वी करण्यासाठी सौ. कुंदा भागवत, उदय वेल्हाळ, लक्ष्मण कांबळे, मधुकर तेरेदेसाई, प्रताप गजमल, प्रकाश आंबुर्ले आणि बजरंग दाभोळे यांनी मोलाचे सहकार्य केले. उस्मान बांगी, नंदकुमार तांबे, माधवी भागवत, दिलीप पाटील आणि अ. गनी वनकर यांनी कार्यक्रमाला शुभेच्छा संदेश पाठवले. एकंदरीत, चिपळूण ज्येष्ठ नागरिक संघाचा हा स्नेहमेळावा उत्साही आणि खेळीमेळीच्या वातावरणात पार पडला
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:16 03-05-2025
