Maharashtra Vidhan Parishad Election Result: विधान परिषद निवडणुकीत महायुतीचा दणदणीत विजय; पाहा विजयी झालेल्या 11 उमेदवारांची यादी

admin

Jul 13, 2024 - 10:07

Maharashtra Vidhan Parishad Election Result: विधान परिषद निवडणुकीत महायुतीचा दणदणीत विजय; पाहा विजयी झालेल्या 11 उमेदवारांची यादी

मुंबई : 11 जागा असताना 12 वा उमेदवार मैदानात उतरवल्यानं विधान परिषदेची निवडणूक चुरशीची झाली. लोकसभा निवडणुकीत महायुतीचा दारुण पराभव झाला होता.

पण विधान परिषदेत (Vidhan Parishad Election) नववा उमेदवार जिंकून आणत महायुतीनं मविआला धक्का दिलाय. काँग्रेसची आठ मतं फुटल्याचं बोललं जातंय. मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवारांनी काटेकोर रणनीती आखत विजय खेचून आणला.

महायुतीनं आपले सर्व 9 उमेदवार निवडून आणले. मविआचे दोन उमेदवार निवडून आले. तर शेकपच्या जयंत पाटलांचा पराभव झाला. काँग्रेसची आठ मतं फुटली आहे. चुरशीच्या ठरलेल्या विधान परिषद निवडणुकीत महायुतीनं महाविकास आघाडीला धोबिपछाड दिलाय. भाजपचे पंकजा मुंडे, अमित गोरखे,परिणय फुके,योगेश टिळेकर हे पहिल्या पसंतीच्या मतांमध्येच निवडून आले. सदाभाऊ खोतांनाही निवडून आणण्यात भाजपनं यश मिळवलं. एकनाथ शिंदेंचे शिवसेना कृपाल तुमाने आणि भावना गवळी हे दोन्ही शिलेदार सहज निवडून आले. अजित पवारांनी शिवाजीराव गर्जे आणि राजेश विटेकर या दोघांनाही निवडून आणलं. दुसऱ्या उमेदवारासाठी मताचा कोटा कमी पडत असतानाही त्यांनी ही किमया करून दाखवली. काँग्रेसच्या प्रज्ञा सातव यांचा विजय झाला...पण काँग्रेसचे आठ आमदार फुटल्यानं त्याचा फायदा महायुतीला झाला. मतांच्या फोडाफोडीवरून एकनाथ शिंदेंनी मविआला टोला लगावलाय. लोकसभेत झालेल्या पराभवाचा वचपा विधान परिषदेत मविआला धोबिपछाड देत महायुतीनं काढलाय. पण खरी लढाई विधानसभेची आहे. उद्धव ठाकरे यांच्या शिवसेनेचे मिलिंद नार्वेकर यांचाही विजय झाला. शेकपच्या जयंत पाटलांना पराभवाचा धक्का बसला आहे.

विधान परिषद निकालाची वैशिष्ट्य पाहूयात...