गुहागर (रत्नागिरी): रत्नागिरी जिल्ह्यातील गुहागर तालुक्यातील खोडदे परिसरात ब्लॅक पँथरचे (काळा बिबट्या) दर्शन झाल्याने परिसरातील ग्रामस्थांमध्ये दहशतीचे वातावरण पसरले आहे. सुरक्षिततेच्या कारणास्तव नागरिकांनी वनविभागाकडे या वन्यप्राण्याचा तातडीने बंदोबस्त करण्याची मागणी लावून धरली आहे.
नक्की काय घडले?
सोमवारी रात्री आठ वाजण्याच्या सुमारास खोडदे देऊळवाडी-खापलेवाडी-डिंगणकरवाडी रस्त्यावर काही ग्रामस्थांना ब्लॅक पँथरचे दर्शन झाले. या घटनेमुळे परिसरात एकच खळबळ उडाली. या ब्लॅक पँथरचे चित्रण स्थानिक नागरिक भूषण पवार यांनी केले असून, त्यामुळे या परिसरात हिंस्त्र प्राण्याचा वावर असल्याचे अधिकृतरीत्या समोर आले आहे.
सहा महिन्यांपूर्वीची घटना ताजी
या परिसरात वन्यप्राण्यांचा वावर नवीन नाही. अवघ्या सहा महिन्यांपूर्वी खोडदे येथील प्रगतशील शेतकरी रमाकांत साळवी यांच्या वाड्यात बिबट्याने घुसखोरी केली होती. चिरेबंदी वाड्याचा दरवाजा तोडून आत शिरलेल्या बिबट्याने साळवी यांच्या वासराचा फडशा पाडला होता. ही घटना अद्याप ग्रामस्थांच्या विस्मृतीत गेलेली नसतानाच, आता ब्लॅक पँथरचे दर्शन झाल्याने भीती अधिकच गडद झाली आहे.
रात्रीच्या प्रवासावर गदा
ब्लॅक पँथरच्या वावरण्यामुळे परिसरातील जनजीवन विस्कळीत झाले आहे. विशेषतः या मार्गावरून ये-जा करणाऱ्या ग्रामस्थांना, तसेच नोकरी-व्यवसायानिमित्त रात्रीच्या वेळी बाहेर पडणाऱ्यांना मोठा धोका निर्माण झाला आहे. भीतीपोटी आता अनेक नागरिकांनी रात्रीची बाहेर पडणे टाळले आहे.
वनविभागाची भूमिका काय?
वन्यप्राण्यांच्या वाढत्या वावरामुळे ग्रामस्थांकडून वनविभागावर टीकेची झोड उठत आहे. परिसरातील नागरिकांच्या जीविताची सुरक्षितता लक्षात घेता, वनविभागाने तातडीने या ब्लॅक पँथरचा शोध घेऊन त्याचा बंदोबस्त करावा, अशी आग्रही मागणी ग्रामस्थांनी केली आहे.
“परिसरात ब्लॅक पँथरचा वावर असल्याचे स्पष्ट झाले आहे. नागरिकांच्या सुरक्षेसाठी वनविभागाने वेळीच दखल घेणे आवश्यक आहे, अन्यथा मोठी दुर्घटना घडण्याची शक्यता नाकारता येत नाही,” असे मत स्थानिक रहिवाशांनी व्यक्त केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:54 22-04-2026
