चिपळूण: रत्नागिरी जिल्ह्यातील चिपळूण येथे १३ वर्षांच्या शाळकरी मुलीवर बलात्कार करून तिला जीवे मारण्याची धमकी देणाऱ्या नराधम आरोपीला चिपळूण येथील विशेष न्यायालयाने २० वर्षे सक्तमजुरी आणि १ लाख रुपये दंडाची शिक्षा सुनावली आहे. विशेष न्यायाधीश डॉ. अनिता एस. नेवसे यांनी हा महत्त्वपूर्ण निकाल दिला, जो अल्पवयीन मुलींवरील अत्याचाराच्या वाढत्या घटनांना पायबंद घालण्यासाठी एक कडक इशारा मानला जात आहे.
काय होती घटना?
मार्च २०१९ मध्ये ही धक्कादायक घटना घडली होती. सायंकाळी ६ वाजण्याच्या सुमारास पीडित मुलगी साखर आणण्यासाठी दुकानात जात होती. यावेळी आरोपी वैभव सुरेश पालशेतकर (वय ३७, रा. चिपळूण) याने निर्जन पुलावर तिला अडवून, बळजबरीने बाजूच्या गवतात नेऊन तिच्यावर लैंगिक अत्याचार केले. इतकेच नव्हे, तर ही घटना कोणाला सांगितल्यास जीवे मारण्याची धमकी दिल्याने घाबरलेल्या मुलीने सुरुवातीला कोणालाही काहीच सांगितले नाही.
गर्भवती आढळल्यानंतर फुटले बिंग
जुलै २०१९ मध्ये मुलीची प्रकृती अचानक बिघडली आणि तिचे शरीर जड वाटू लागल्याने आईने तिला उपचारांसाठी चिपळूण येथील रुग्णालयात नेले. तेथे डॉक्टरांनी सोनोग्राफीचा सल्ला दिला. त्यानंतर मुंबईतील ‘अश्विनी हॉस्पीटल’मध्ये केलेल्या तपासणीत मुलगी १९ आठवड्यांची गरोदर असल्याचे उघड झाले. आईने विश्वासात घेऊन विचारणा केली असता, मुलीने घडलेला प्रकार सांगितला.
पोलिसी तपासाचा प्रवास
पीडितेच्या आईने सुरुवातीला मुंबईतील कफ परेड पोलीस ठाण्यात तक्रार दाखल केली. गुन्हा चिपळूणच्या हद्दीत घडल्याने हा खटला चिपळूण पोलीस ठाण्याकडे वर्ग करण्यात आला. सहाय्यक पोलीस निरीक्षक वर्षा शिंदे यांनी या गुन्ह्याचा सखोल तपास केला, तर पोलीस हेड कॉस्टेबल विनायक चव्हाण यांनी पैरवी अधिकारी म्हणून काम पाहिले.
न्यायालयाचा निकाल आणि सरकारी पक्षाचा युक्तीवाद
चिपळूणच्या विशेष न्यायालयात हा खटला सुरू असताना, विशेष सरकारी अभियोक्ता अनुपमा ठाकूर यांनी सरकार पक्षातर्फे अत्यंत प्रभावी बाजू मांडली. एकूण १४ साक्षीदारांची साक्ष आणि भक्कम पुराव्यांच्या आधारे आरोपीचे गुन्हे सिद्ध करण्यात अभियोक्ता यशस्वी ठरल्या.
न्यायालयाने दिलेली शिक्षा:
- सक्तमजुरी: २० वर्षे.
- दंड: १ लाख रुपये (दंड न भरल्यास १ वर्षाची अतिरिक्त सक्तमजुरी).
- नुकसान भरपाई: दंडाची संपूर्ण रक्कम पीडितेला नुकसान भरपाई म्हणून देण्याचे आदेश न्यायालयाने दिले आहेत.
न्यायाधीश डॉ. अनिता नेवसे यांनी भारतीय दंड विधान (IPC) कलम ३७६ (३), ५०६ आणि पोक्सो कायदा (POCSO Act) ४, ६, ८, १२ अन्वये आरोपीला दोषी ठरवून ही शिक्षा सुनावली. या निकालामुळे पीडित मुलीच्या कुटुंबीयांना न्याय मिळाला असून, परिसरात या निकालाचे स्वागत होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:33 24-04-2026
