खेड: मुंबई-गोवा महामार्गावर अपघातांची मालिका सुरूच असून, शुक्रवारी पहाटे खेड तालुक्यातील भरणे येथे एक भीषण अपघात झाला. भरधाव वेगातील वॅगनआर कारने रस्त्याच्या कडेला उभ्या असलेल्या ट्रकला पाठीमागून जोरदार धडक दिली. या अपघातात एका वर्षाच्या चिमुरडीसह एकूण ६ प्रवासी गंभीर जखमी झाले आहेत.
नेमकी घटना काय?
मिळालेल्या माहितीनुसार, १ मे रोजी पहाटे ३:१० वाजण्याच्या सुमारास हा अपघात घडला. मुंबईतील भांडुप येथून वॅगनआर कार (क्रमांक MH 03 FC 1145) कोकणातील मालवणच्या दिशेने जात होती. ही कार खेड तालुक्यातील भरणे येथील एसएमएस (SMS) हॉस्पिटलसमोर आली असता, चालकाचे नियंत्रण सुटल्याने कार तेथे उभ्या असलेल्या ट्रकवर (क्रमांक KA 02 AG 2025) पाठीमागून जाऊन आदळली.
एका वर्षाच्या चिमुरडीसह ८० वर्षीय वृद्धा जखमी
ही धडक इतकी भीषण होती की कारच्या दर्शनी भागाचा अक्षरशः चक्काचूर झाला आहे. कारमधील सर्व सहा प्रवासी जखमी झाले असून, त्यामध्ये एका वर्षाच्या चिमुरडीचा आणि ८० वर्षीय वृद्धेचा समावेश आहे. पहाटेची वेळ असल्याने आणि रस्ता मोकळा असल्याने कारचा वेग जास्त असल्याची शक्यता वर्तवण्यात येत आहे.
स्थानिक तरुण आणि रुग्णवाहिकेची तत्परता
अपघाताचा आवाज ऐकताच स्थानिक ग्रामस्थ सुजित शिंदे आणि शुभम यांनी तातडीने घटनास्थळी धाव घेतली. त्यांनी प्रसंगावधान राखून जगद्गुरु रामानंदाचार्य नरेंद्राचार्यजी महाराज संस्थानच्या विनामूल्य रुग्णवाहिकेला पाचारण केले. रुग्णवाहिका कर्मचाऱ्यांच्या मदतीने कारमध्ये अडकलेल्या जखमींना सुखरूप बाहेर काढून तातडीने जवळच्या खासगी रुग्णालयात दाखल करण्यात आले. सध्या सर्व जखमींवर उपचार सुरू आहेत.
महामार्गावरील ‘उभी वाहने’ ठरतायत कर्दनकाळ
मुंबई-गोवा महामार्गावर रात्रीच्या वेळी किंवा पहाटेच्या सुमारास रस्त्याच्या कडेला अनधिकृतपणे उभी केलेली अवजड वाहने अपघातांना निमंत्रण देत आहेत. भरणे येथील हा अपघात देखील उभ्या असलेल्या ट्रकमुळेच घडल्याने वाहनचालकांमध्ये संताप व्यक्त होत आहे. पोलीस या प्रकरणाचा अधिक तपास करत आहेत.
ठळक मुद्दे:
- ठिकाण: भरणे, खेड (मुंबई-गोवा महामार्ग)
- वेळ: पहाटे ३:१० मिनिटे
- कार नंबर: MH 03 FC 1145 (भांडुप ते मालवण)
- जखमी: ६ प्रवासी (१ वर्षाच्या चिमुरडीसह ८० वर्षीय वृद्धेचा समावेश)
- मदत: जेआरएनएम (JRNM) रुग्णवाहिका आणि स्थानिक ग्रामस्थ.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
07:23 02-05-2026
