रत्नागिरी : रत्नागिरी जिल्हा शरीरसौष्ठव असोसिएशनचे कार्याध्यक्ष आणि ज्येष्ठ शरीरसौष्ठवपटू श्री. वीरेंद्र वणजू यांच्या शिरपेचात आणखी एक मानाचा तुरा खोवला गेला आहे. त्यांची ‘इंडियन फिटनेस अँड बॉडी बिल्डर्स फेडरेशन’ (IFBF) च्या राष्ट्रीय कार्यकारिणी सदस्यपदी एकमताने निवड करण्यात आली आहे. रत्नागिरी येथे नुकत्याच पार पडलेल्या राष्ट्रीय कार्यकारिणीच्या महत्त्वपूर्ण बैठकीत हा निर्णय घेण्यात आला असून, यामुळे संपूर्ण जिल्ह्यातून त्यांच्यावर अभिनंदनाचा वर्षाव होत आहे. रत्नागिरीत नुकतीच ७२ व्या राष्ट्रीय शरीरसौष्ठव स्पर्धा मंत्री उदय सामंत यांच्या पुढाकाराने पार पडली. या स्पर्धेची दखल घेत वीरेंद्र वणजू यांच्या रूपाने रत्नागिरीला नेतृत्व देण्याच्या हेतूने हि निवड करण्यात आली आहे.
बैठकीत एकमताने महत्त्वपूर्ण निर्णय
IFBF च्या राष्ट्रीय कार्यकारिणीची बैठक रत्नागिरीत पार पडली. या महत्त्वपूर्ण बैठकीला राष्ट्रीय अध्यक्ष कमलाकर पाटील, राष्ट्रीय सचिव बी. कृष्णराव, राष्ट्रीय कार्याध्यक्ष सदानंद जोशी, विजय काटदरे, विनय केतकर यांच्यासह कार्यकारिणीचे सर्व प्रमुख पदाधिकारी उपस्थित होते. या सर्व मान्यवरांच्या उपस्थितीत आणि सहमतीने श्री. वीरेंद्र वणजू यांच्या कार्याची दखल घेत त्यांची या राष्ट्रीय पदावर नियुक्ती जाहीर करण्यात आली.
शरीरसौष्ठव आणि क्रीडा क्षेत्रात आनंदाचे वातावरण
वीरेंद्र वणजू यांनी गेल्या अनेक वर्षांपासून शरीरसौष्ठवपटू म्हणून जिल्हा आणि राज्य स्तरावर आपले मोलाचे योगदान दिले आहे. सध्या ते रत्नागिरी जिल्हा शरीरसौष्ठव असोसिएशनमध्ये कार्याध्यक्ष म्हणून अत्यंत यशस्वीरीत्या जबाबदारी सांभाळत आहेत. खेळाडू म्हणून मिळवलेले यश आणि प्रशासकीय स्तरावर संघटना बांधणीत दिलेले योगदान यामुळे त्यांची ओळख सर्वदूर आहे. त्यांच्या या प्रदीर्घ अनुभवाचा आणि संघटन कौशल्याचा मोठा फायदा आता थेट राष्ट्रीय स्तरावर फेडरेशनला मिळणार आहे.
मान्यवरांकडून अभिनंदनाचा वर्षाव
श्री. वीरेंद्र वणजू यांच्या या राष्ट्रीय पातळीवरील निवडीमुळे रत्नागिरीच्या क्रीडा क्षेत्रात आणि विशेषतः शरीरसौष्ठव प्रेमींमध्ये प्रचंड उत्साहाचे वातावरण निर्माण झाले आहे. जिल्ह्यातील विविध क्रीडा संघटना, आजी-माजी खेळाडू, आणि क्रीडाप्रेमींकडून त्यांच्यावर अभिनंदनाचा वर्षाव होत आहे. त्यांच्या या नवीन आणि अत्यंत महत्त्वाच्या जबाबदारीबद्दल त्यांना पुढील वाटचालीस सर्वांकडून भरघोस शुभेच्छा दिल्या जात आहेत.
