खेड:
मुंबई-गोवा महामार्गावरील धोकादायक मानल्या जाणाऱ्या भोस्ते घाटात ३ मे रोजी सकाळी सव्वा नऊच्या सुमारास एका ईर्टिगा कारचा भीषण अपघात झाला. कारवरील चालकाचा ताबा सुटल्याने झालेल्या या अपघातात एकाच कुटुंबातील चार जण जखमी झाले. हे सर्व प्रवासी मुंबईतील मालाड परिसरातील रहिवासी आहेत.
नेमकी घटना काय?
मिळालेल्या माहितीनुसार, ईर्टिगा कार (MH-03-BJ-2290) मुंबईहून रत्नागिरीच्या दिशेने जात होती. सकाळी ९:४० वाजण्याच्या सुमारास कार भोस्ते घाटात आली असता, चालकाचे वाहनावरील नियंत्रण सुटले आणि कार जोरात रस्त्यालगतच्या सुरक्षा भिंतीवर जाऊन धडकली. ही धडक इतकी जोरदार होती की कारचे मोठे नुकसान झाले आहे.
जखमींची नावे:
या अपघातात खालील प्रवासी जखमी झाले असून त्यांच्यावर उपचार सुरू आहेत:
- निकिता अनंत साळवी (३० वर्षे)
- अश्विनी अनंत साळवी (५८ वर्षे)
- अनंत शंकर साळवी (६१ वर्षे)
- अद्विक कृष्णा नवाले (५ वर्षे)(सर्व रा. मालाड, मुंबई)
रुग्णवाहिका आणि पोलिसांची तत्परता
अपघाताची माहिती मिळताच मदतकार्य वेगाने सुरू झाले. भरणे नाका ब्रिजखाली तैनात असलेली जगद्गुरु रामनंदाचार्य श्री नरेंद्राचार्य जी संस्थान, नाणिज धाम यांची विनामूल्य रुग्णवाहिका अवघ्या काही मिनिटांत घटनास्थळी दाखल झाली. त्याचबरोबर खेड वाहतूक शाखेचे पोलीस कर्मचारी संपत गीते यांनीही तातडीने धाव घेत जखमींना गाडीबाहेर काढण्यास मदत केली.
या अपघातामुळे महामार्गावरील वाहतूक काही काळासाठी विस्कळीत झाली होती, मात्र पोलिसांनी अपघातग्रस्त वाहन बाजूला करून वाहतूक पूर्ववत केली.
या घटनेचा अधिक तपास खेड पोलीस करत आहेत. महामार्गावर प्रवास करताना चालकांनी वेगावर नियंत्रण ठेवावे, असे आवाहन वाहतूक पोलिसांकडून करण्यात येत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:01 04-05-2026
