◼️ भगवतीनगर-निवेंडी येथील घटना; खेळता खेळता विहिरीत पडल्याने गमावला प्राण
रत्नागिरी: रत्नागिरी Child Accident ची एक अत्यंत हृदयद्रावक घटना समोर आली असून, तालुक्यात पर्यटनासाठी आलेल्या ठाण्यातील एका तीन वर्षीय चिमुरडीचा विहिरीत पडून दुर्दैवी मृत्यू झाला आहे. भगवतीनगर-निवेंडी येथे बुधवार, ३ जून रोजी सायंकाळी ५ वाजण्याच्या सुमारास ही घटना घडली. खेळता खेळता अचानक विहिरीत पडल्याने या बालिकेला आपला प्राण गमवावा लागला असून, या घटनेमुळे परिसरात हळहळ व्यक्त केली जात आहे.
देवदर्शनासाठी आलेल्या कुटुंबावर कोसळला दुःखाचा डोंगर
प्राप्त माहितीनुसार, स्वरा स्वप्नेश जाधव (वय ३ वर्षे, रा. नागाव विशाल कंम्पाउंड चाळ, दहिसर, ठाणे) असे विहिरीत पडून मृत्यू झालेल्या बालिकेचे नाव आहे. स्वराची आई श्वेता जाधव ही आपली मुलगी स्वरा आणि इतर मित्र-मैत्रिणींसोबत रत्नागिरी जिल्ह्यातील भगवतीनगर निवेंडी येथे देवदर्शन आणि पर्यटनासाठी आली होती. सर्व जण तेथे वास्तव्याला असताना बुधवारी सायंकाळी स्वरा ही राहत्या परिसरामध्ये इतर मुलांसोबत खेळत होती.
शोध घेतला असता विहिरीच्या पाण्यात तरंगताना आढळली
काही वेळानंतर खेळणाऱ्या इतर मुलांमध्ये स्वरा दिसून न आल्याने तिची आई श्वेता जाधव यांनी तातडीने आजूबाजूच्या परिसरात तिचा शोध घेण्यास सुरुवात केली. शोध घेत असताना त्यांनी जवळच असलेल्या एका विहिरीत डोकावून पाहिले. त्यावेळी स्वरा ही विहिरीच्या पाण्यावर उपड्या स्थितीत तरंगताना आढळून आली. हा प्रकार समोर येताच स्थानिक नागरिक राहुल कैलास पाटील व इतर लोकांनी तातडीने धाव घेत दोरीच्या साहाय्याने स्वराला विहिरीबाहेर काढले.
प्राथमिक आरोग्य केंद्रात डॉक्टरांनी घोषित केले मृत
विहिरीतून बाहेर काढले तेव्हा स्वरा बेशुद्ध अवस्थेत होती. तिला शुद्धीवर आणण्यासाठी नागरिकांनी तात्काळ सीपीआर (CPR) देऊन प्रथमोपचार केले आणि उपचारांसाठी तातडीने प्राथमिक आरोग्य केंद्र मालगुंड येथे दाखल केले. मात्र, तेथील वैद्यकीय अधिकाऱ्यांनी स्वराला तपासताच ती उपचारापूर्वीच मृत झाली असल्याचे घोषित केले. या प्रकरणी स्वराची आई श्वेता जाधव यांनी जयगड पोलीस ठाण्यात अधिकृत माहिती दिली असून, पोलिसांत आकस्मिक मृत्यूची नोंद करण्यात आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:12 05-06-2026
