आंतरराष्ट्रीय बाजारात कच्च्या तेलाच्या किमती वाढल्याने कंपनीचा निर्णय; देशभरातील ७,१०८ पेट्रोल पंपांवर किमती वाढणार
नवी दिल्ली :
भारतातील खासगी क्षेत्रातील सर्वात मोठी पेट्रोलियम रिटेलर कंपनी ‘नायरा एनर्जी’ने (Nayara Energy) इंधनाचे दर वाढवण्याचा मोठा निर्णय घेतला आहे. कंपनीने पेट्रोल आणि डिझेलच्या दरात केलेली ही वाढ तात्काळ प्रभावाने लागू करण्यात आली आहे. आंतरराष्ट्रीय तेल बाजारात क्रूड ऑईलच्या (Crude Oil) किमतीत झालेली वाढ आणि त्यामुळे वाढलेल्या दबावामुळे कंपनीने हा निर्णय घेतला असल्याचे स्पष्ट केले आहे.
देशभरातील ७,१०८ पंपांवर नवीन दर लागू
नायरा एनर्जीकडून देशभरात तब्बल ७,१०८ पेट्रोल पंप चालवले जातात. या सर्व पंपांवर शनिवारी पेट्रोल आणि डिझेलचे नवे वाढीव दर लागू करण्यात आले आहेत. भोपाळसारख्या शहरांमध्ये नायराच्या पंपांवर पेट्रोलचा दर १२० रुपये प्रतिलिटर, तर डिझेलचा दर १०३ रुपये प्रतिलिटरवर पोहोचल्याची माहिती समोर येत आहे.
यापूर्वी मार्च महिन्यात अमेरिका व इराण यांच्यातील संघर्षादरम्यान होर्मुझच्या आखातातून होणारा तेलपुरवठा प्रभावित झाला होता. त्यावेळी नायराने २६ मार्च रोजी पेट्रोल ५ रुपयांनी तर डिझेल ३ रुपयांनी वाढवले होते. मात्र, जुलै महिन्यात दर घसरल्यानंतर कंपनीने १ जुलै रोजी ही वाढ मागे घेत दरांमध्ये कपात केली होती. आता पुन्हा एकदा आंतरराष्ट्रीय बाजारातील घडामोडींमुळे कंपनीला दरवाढ करावी लागली आहे.
सरकारी ऑईल कंपन्या आणि जिओ-बीपीचे दर कायम
भारतातील इंधन बाजारात आजही सरकारी कंपन्यांचे मोठे वर्चस्व आहे. इंडियन ऑईल कॉर्पोरेशन (IOCL), भारत पेट्रोलियम (BPCL) आणि हिंदुस्तान पेट्रोलियम (HPCL) या सरकारी कंपन्यांचे मिळून देशभरात १,०४,१३७ पेट्रोल पंप आहेत. या सार्वजनिक क्षेत्रातील कंपन्यांनी सध्या तरी आपल्या दरांमध्ये कोणताही बदल केलेला नाही.
त्याचप्रमाणे रिलायन्स आणि यूकेस्थित बीपी कंपनीची संयुक्त भागीदारी असलेल्या ‘जिओ-बीपी’ने (Jio-BP) देखील आपल्या २,३०४ पेट्रोल पंपांवर इंधनाचे दर वाढवलेले नाहीत. त्यामुळे सध्या केवळ नायरा एनर्जीच्या ग्राहकांना या दरवाढीचा फटका बसणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
05:00 03-10-2026
