गुजरातमध्ये विकलेला १०० टक्के मुद्देमाल हस्तगत; मुख्य सूत्रधारासह चारही संशयितांची न्यायालयीन कोठडीत रवानगी
लोटे (खेड): Lote MIDC Theft Case अंतर्गत खेड तालुक्यातील लोटे औद्योगिक वसाहतीमध्ये घडलेल्या एका मोठ्या आणि धाडसी चोरीचा छडा लावण्यात खेड पोलिसांना पूर्णपणे यश आले आहे. येथील ‘ॲक्वा फूड एक्झीम’ कंपनीतून लाखो रुपयांच्या महागड्या यंत्रसामग्रीसह (मशनरी) अन्य काही महत्त्वाचे साहित्य चोरणाऱ्या आंतरराज्य टोळीतील चौघांना पोलिसांनी गजाआड केले आहे. चोरट्यांनी भावनगर (गुजरात) येथील एका दुकानात विकलेला तब्बल १५ लाख रुपये किंमतीचा मुद्देमालही पोलिसांनी जप्त केला असून, सर्व संशयितांची न्यायालयाने आता न्यायालयीन कोठडीत रवानगी केली आहे. ही चोरी २५ फेब्रुवारी ते १४ मार्च २०२६ या कालावधीत घडली होती.
ओडिसा आणि मुंबईतील आरोपींचा समावेश; देवरचंद राणा मुख्य सूत्रधार
खेड पोलिसांनी तांत्रिक तपास आणि गुप्त माहितीच्या आधारे या चोरीचा छडा लावला. याप्रकरणी अटक करण्यात आलेल्या संशयित आरोपींची नावे खालीलप्रमाणे आहेत: १. जगन्नाथ विभूती (वय २६, रा. तुसरा-ओरिसा) २. दिलीप लक्ष्मण माझी (वय ३०, रा. चुडापाली-ओरिसा) ३. मंगेश शंकर काळे (वय ३८, रा. दिघागाव-नवी मुंबई) ४. देवरचंद साधू राणा (रा. राताखंडी-ओरिसा)
पोलिसांनी केलेल्या कसून चौकशीत देवरचंद साधू राणा हाच या संपूर्ण हायप्रोफाईल चोरी प्रकरणाचा मुख्य सूत्रधार (Mastermind) असल्याचे उघड झाले आहे. याशिवाय, संशयितांनी चोरीचे जड साहित्य वाहून नेण्यासाठी वापरलेली MH 01 EM 9238 आणि MH 04 FR 1003 या क्रमांकांची दोन्ही वाहनेही पोलिसांनी जप्त केली आहेत.
बँकेकडे तारण असलेले व डेन्मार्कवरून मागवलेले साहित्य लंपास
लोटे येथील या कंपनीत झालेल्या चोरीचे स्वरूप अत्यंत गंभीर होते. चिपळूण येथील बँक ऑफ महाराष्ट्र शाखेकडे तारण ठेवलेले कंपनीतील चार मोठ्या मशिन्सचे महागडे स्पेअर पार्ट्स आणि मशिन्सचे प्रेशर वॉल्व्ह अज्ञात चोरट्यांनी अतिशय नियोजनबद्ध पद्धतीने लंपास केले होते. याव्यतिरिक्त, कंपनीने थेट डेन्मार्क देशातून ‘डॅनटेक फ्रिजिंग सिस्टीम’ (Dantech Freezing Systems) या नामांकित कंपनीकडून विकत घेतलेले तब्बल ७५० किलो वजनाचे अत्याधुनिक तांत्रिक साहित्यही चोरट्यांनी लांबवले होते. या प्रचंड चोरीबाबत १७ मार्च रोजी खेड पोलीस ठाण्यात अज्ञात चोरांविरुद्ध गुन्हा दाखल करण्यात आला होता.
खेड पोलिसांची कौतुकास्पद कामगिरी; १००% मुद्देमाल जप्त
औद्योगिक वसाहतीमधील या मोठ्या चोरीमुळे लोटे एमआयडीसी परिसरातील सुरक्षेचा प्रश्न ऐरणीवर आला होता. मात्र, खेड पोलीस ठाण्याचे पोलीस निरीक्षक विवेक अहिरे यांच्या थेट मार्गदर्शनाखाली पोलीस उपनिरीक्षक श्रीकृष्ण येवले आणि पोलीस शिपाई विजेंद्र सातार्डेकर यांच्या पथकाने अत्यंत वेगाने तपास चक्र फिरवली.
आरोपींचा माग काढत पोलिसांनी थेट गुजरात गाठले आणि भावनगरमध्ये विकलेला १५ लाख रुपयांचा १०० टक्के मुद्देमाल हस्तगत करण्यात यश मिळवले. पोलिसांच्या या जलद आणि यशस्वी कामगिरीबद्दल लोटे औद्योगिक वसाहतीतील उद्योजकांकडून खेड पोलीस प्रशासनाचे मोठे कौतुक केले जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:11 05-06-2026
