दोन लाख रुपयांची रोख रक्कम जप्त; लांजा येथील कापड दुकान कर्मचाऱ्याला लावला होता चुना
देवरूख: ‘Sangameshwar Fraud Arrest’ | बनावट सोन्याचे दागिने खरे असल्याचे भासवून एका व्यक्तीची साडेतीन लाख रुपयांची फसवणूक करणाऱ्या आंतरराज्य टोळीतील मुख्य आरोपीला संगमेश्वर पोलिसांनी अत्यंत शिताफीने अटक केली आहे. अटक करण्यात आलेल्या आरोपीकडून पोलिसांनी दोन लाख रुपयांची रोकड जप्त केली आहे. या गुन्ह्यातील त्याचा मुख्य साथीदार मात्र अद्याप फरार असून पोलीस त्याचा कसून शोध घेत आहेत.
या आर्थिक फसवणूक प्रकरणाबाबत दिलेश प्रकाश गुजर (राहणार बेणी खुर्द-गुजरवाडी, तालुका लांजा, जिल्हा रत्नागिरी) यांनी संगमेश्वर पोलीस ठाण्यात रीतसर फिर्याद दिली होती. फिर्यादीनुसार, २० एप्रिल रोजी दिलेश गुजर हे लांजा येथील ‘यंग लूक’ नावाच्या कपड्यांच्या दुकानात आपले दैनंदिन काम करत असताना हा प्रकार सुरू झाला.
त्या दिवशी जितेंद्र कुमार मोहनलाल परमार (राहणार राजस्थान) आणि त्याचा एक साथीदार या दुकानात ग्राहक म्हणून आले. त्यांनी गुजर यांच्याशी संवाद साधत स्वतःची मोठी आर्थिक अडचण असल्याचे सांगितले. तसेच गावाकडे लग्नकार्य असल्याने तातडीने पैशांची गरज आहे, म्हणूनच आपल्या जवळील सोने विकायचे आहे, अशी बतावणी त्यांनी केली.
गुजर यांचा विश्वास संपादन करण्यासाठी आरोपींनी त्यांच्याकडील जोंधळी मणी असलेले सोन्याचे दागिने दाखवले. इतकेच नव्हे, तर त्या दागिन्यांमधील काही मणी प्रत्यक्ष तपासणीसाठी गुजर यांच्याकडे सुपूर्द केले. चाचणीत ते मणी खरे निघाल्यामुळे गुजर यांचा दोन्ही आरोपींवर पूर्ण विश्वास बसला. त्यानंतर दोन्ही बाजूंनी साडेतीन लाख रुपयांमध्ये या संपूर्ण दागिन्यांचा व्यवहार निश्चित केला.
ठरलेल्या नियोजनानुसार, २८ एप्रिल रोजी संगमेश्वर एसटी स्थानक (एसटी डेपो) परिसरात या दोन्ही आरोपींनी दिलेश गुजर यांची भेट घेतली. त्या ठिकाणी बनावट सोन्याचे दागिने गुजर यांच्या स्वाधीन करून त्यांच्याकडून साडेतीन लाख रुपयांची रोकड हस्तगत केली आणि तिथून पोबारा केला. नंतर हे दागिने बनावट असल्याचे उघडकीस आल्यानंतर आपली फसवणूक झाल्याचे गुजर यांच्या लक्षात आले.
पीडित गुजर यांनी संगमेश्वर पोलीस ठाण्यात धाव घेत तक्रार दाखल केल्यानंतर पोलीस निरीक्षक राजाराम चव्हाण यांच्या मार्गदर्शनाखाली तपास पथकाने तातडीने चक्रा फिरवली. तांत्रिक विश्लेषणाच्या आधारे पोलिसांनी मुख्य संशयित आरोपी जितेंद्र कुमार मोहनलाल परमार याला बेड्या ठोकल्या. अटक सत्रादरम्यान त्याच्याकडून फसवणुकीच्या रकमेतील दोन लाख रुपये जप्त करण्यात पोलिसांना यश आले आहे. या गुन्ह्यातील फरार असलेल्या दुसऱ्या आरोपीचा शोध घेण्यासाठी पोलिसांची पथके रवाना झाली असून, त्यालाही लवकरच अटक करण्यात येईल, अशी माहिती पोलीस निरीक्षक राजाराम चव्हाण यांनी दिली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:04 08-06-2026
