उर्वरित शाळांच्या प्रस्तावांना आचारसंहिता संपल्यानंतर मंजुरी; नव्या शैक्षणिक सत्रात शाळा गजबजणार
चिपळूण शहर: ‘Chiplun ZP School Repair’ | सर्वसामान्य कुटुंबातील मुलांच्या शिक्षणाचा मुख्य आधार असलेल्या चिपळूण तालुक्यातील ११ जिल्हा परिषद (जि. प.) शाळांच्या दुरुस्तीचे काम आता अंतिम टप्प्यात आले आहे. पावसाळा तोंडावर आल्याने या कामांमध्ये प्रामुख्याने गळक्या छप्परांची दुरुस्ती करण्याला प्रशासनाने सर्वोच्च प्राधान्य दिले आहे. लवकरच ही सर्व कामे पूर्ण होणार असल्याने, १५ जूनपासून सुरू होणाऱ्या नव्या शैक्षणिक सत्रात विद्यार्थ्यांना गळक्या छतांखाली बसावे लागणार नाही. मात्र, उर्वरित शाळांच्या दुरुस्तीला सध्या लागू असलेल्या आचारसंहितेचा ब्रेक लागला आहे.
एकेकाळी उत्तम विद्यार्थी संख्येमुळे सातत्याने प्रकाशझोतात आलेल्या जिल्हा परिषद शाळा अलीकडच्या काळात पटसंख्येअभावी ओस पडू लागल्याचे चित्र निर्माण झाले आहे. ही चिंताजनक स्थिती बदलण्यासाठी आणि शाळांमधील विद्यार्थी संख्या वाढवण्यासाठी शासन स्तरावरून गुणवत्तेत वाढ करणारे अनेक नाविन्यपूर्ण उपक्रम हाती घेण्यात आले आहेत. १५ जूनपासून नवीन शैक्षणिक वर्षाला सुरुवात होत असल्याने या जिल्हा परिषद शाळा पुन्हा एकदा विद्यार्थ्यांच्या किलबिलाटाने गजबजणार आहेत. याच पार्श्वभूमीवर विद्यार्थ्यांची गैरसोय टाळण्यासाठी तालुक्यातील २० शाळांच्या दुरुस्तीचे प्रस्ताव पंचायत समितीच्या शिक्षण विभागाकडून वरिष्ठ स्तरावर मंजुरीसाठी पाठवण्यात आले होते.
वरिष्ठ स्तरावरून पाठवण्यात आलेल्या या २० प्रस्तावांपैकी अखेर ११ शाळांच्या दुरुस्तीच्या प्रस्तावांना प्रशासकीय मंजुरी मिळाली. मंजुरी मिळताच काही दिवसांपूर्वीच या सर्व शाळांच्या दुरुस्तीचे काम युद्धपातळीवर सुरू करण्यात आले होते. यामध्ये प्रामुख्याने खालील शाळांचा समावेश असून त्यांची कामे आता पूर्णत्वाकडे आहेत:
- जि. प. शाळा असुर्डे-निर्मळवाडी
- जि. प. शाळा रेहेळ नंबर १
- जि. प. शाळा बोरगाव क्रमांक १
- जि. प. शाळा उभळे-आगारगाव क्रमांक १
- जि. प. शाळा कोळकेवाडी-पठारवाडी
- जि. प. उर्दू शाळा वाघीवरे
- जि. प. शाळा नांदीवसे-लागडेवाडी
- जि. प. शाळा नांदीवसे-गणेशपूर
- जि. प. शाळा कालुस्ते-मराठवाडी
- जि. प. शाळा रामपूर क्रमांक २
- जि. प. शाळा आंबेरे
दरम्यान, २० पैकी ११ शाळांच्या दुरुस्तीचे काम पावसाळ्यापूर्वी पूर्ण होणार असले तरी, उर्वरित ९ शाळांच्या दुरुस्तीच्या प्रस्तावांना सध्या लागू असलेली निवडणूक आचारसंहिता संपल्यानंतरच मंजुरी मिळणार आहे. मंजुरी प्रक्रियेला झालेल्या या तांत्रिक विलंबाचा फटका उर्वरित शाळांमधील विद्यार्थ्यांना बसण्याची शक्यता आहे. या शाळांची छप्पर दुरुस्ती प्रत्यक्ष पूर्ण होईपर्यंत, येथील चिमुरड्यांना नाईलाजाने पहिल्या पावसाळ्यात गळक्या शाळांमध्येच शिक्षणाचे धडे गिरवावे लागणार आहेत. त्यामुळे आचारसंहिता संपताच प्रशासनाने या शाळांची कामेही प्राधान्याने हाती घ्यावीत, अशी मागणी ग्रामीण भागातून होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:04 08-06-2026
