Ratnagiri Sunday on Cycle उपक्रमातून तंदुरुस्त जीवनशैलीचा संदेश; १०० हून अधिक सायकलिस्टचा रॅलीत सहभाग
रत्नागिरी: जागतिक सायकल दिनाचे औचित्य साधून भारत सरकारच्या ‘फिट इंडिया मिशन’ अंतर्गत राबवण्यात येणाऱ्या ‘संडे ऑन सायकल’ अभियानाला रत्नागिरी शहरात नागरिकांनी प्रचंड प्रतिसाद दिला. ‘Ratnagiri Sunday on Cycle’ या विशेष मोहिमे अंतर्गत रविवारी सकाळी शहरातील मुख्य मार्गांवर भव्य सायकल रॅलीचे आयोजन करण्यात आले होते. यामध्ये लहान मुलांपासून ते महिला, पुरुष आणि ज्येष्ठ नागरिकांपर्यंत १०० हून अधिक जणांनी अत्यंत उत्साहाने आपला सहभाग नोंदवत पर्यावरण संवर्धन आणि आरोग्याचा संदेश दिला.
या पर्यावरणपूरक आणि आरोग्यदायी उपक्रमाचे आयोजन जिल्हा प्रशासन, जिल्हा परिषद, जिल्हा पोलीस अधीक्षक कार्यालय, जिल्हा क्रीडा अधिकारी कार्यालय, इंडियन कोस्टगार्ड एअर स्टेशन आणि रत्नागिरी सायकलिस्ट क्लब यांच्या संयुक्त विद्यमाने करण्यात आले होते. शासकीय यंत्रणा आणि स्थानिक क्रीडा संस्था एकत्र आल्यामुळे या अभियानाला व्यापक स्वरूप प्राप्त झाले.
या सायकल रॅलीची सुरुवात मारुती मंदिर येथून मान्यवरांच्या हस्ते हिरवा झेंडा दाखवून करण्यात आली. त्यानंतर ही रॅली मारुती मंदिर सर्कल, सायकल ट्रॅक रोड, नूतननगर, अभ्युदयनगर, पॉवर हाऊसमार्गे पुन्हा मारुती मंदिर सर्कल अशा नियोजित ५ किलोमीटर अंतराच्या मार्गावर काढण्यात आली. ५ किलोमीटरच्या या पूर्ण टप्प्यात रत्नागिरी सायकलिस्ट क्लबच्या बालदोस्तांसह, महिला आणि नियमित सायकल चालवणाऱ्या सायकलिस्टनी शिस्तबद्ध पद्धतीने सायकलिंग करत रॅली यशस्वी केली.
सध्याच्या आधुनिक आणि गतिमान युगात दैनंदिन जीवनात सायकल वापराचे महत्त्व अधोरेखित करणे, प्रदूषण कमी करून पर्यावरण संवर्धनास चालना देणे आणि नागरिकांमध्ये निरोगी जीवनशैलीबाबत व्यापक जागरूकता निर्माण करणे हा या उपक्रमाचा मुख्य हेतू होता. सायकलिंग हा केवळ एक व्यायाम नसून तो अतिशय आरोग्यदायी, पर्यावरणपूरक व किफायतशीर वाहतुकीचा उत्तम पर्याय आहे. नियमित सायकल चालवल्यामुळे शारीरिक आणि मानसिक तंदुरुस्ती उत्कृष्ट राखण्यास मोठी मदत होते, असा मौल्यवान संदेश या रॅलीच्या माध्यमातून संपूर्ण रत्नागिरीकरांना देण्यात आला.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:32 09-06-2026
