देवडे-बोरिवली बसमधील तांत्रिक बिघाडामुळे प्रवाशांना रात्रीचा मनस्ताप; संगमेश्वर स्थानकात कायमस्वरूपी मेकॅनिक नसल्याने खोळंबा
देवरुख / संगमेश्वर: ST Bus Battery Blast झाल्याची एक अत्यंत गंभीर आणि थरारक घटना रविवारी रात्री साडेआठच्या सुमारास संगमेश्वर बस स्थानकात घडली. देवरुख आगाराची ‘देवडे ते बोरिवली’ जाणारी (एम.एच. १४ एल.एक्स. ७१४२) ही लांब पल्ल्याची बस स्थानकात उभी असताना अचानक तिच्या बॅटरीचा कानठळ्या बसवणारा मोठा स्फोट झाला. या भीषण आवाजामुळे संपूर्ण आगार परिसर हादरून गेला आणि बसमधील प्रवाशांमध्ये एकच खळबळ उडाली. सुदैवाने ही गाडी स्थानकात उभी असताना हा प्रकार घडल्याने मोठी जीवितहानी टळली असली, तरी एसटी महामंडळाच्या सुट्या भागांच्या निकृष्ट दर्जाबद्दल आणि देखभालीच्या अभावाबद्दल प्रवाशांमधून तीव्र संताप व्यक्त होत आहे.
चालकाची आणि वाहकाची तत्परता; टळली पुढील मोठी दुर्घटना
हा स्फोट झाला तेव्हा बसचे चालक आणि वाहक स्थानकाच्या नियंत्रण कक्षात गाडीची नोंद करण्यासाठी गेले होते. आवाज ऐकताच त्यांनी परिस्थितीचे गांभीर्य ओळखून तातडीने बसकडे धाव घेतली. बॅटरी कक्षातून प्रचंड धूर आणि रासायनिक पाणी बाहेर फेकले जात होते. चालक-वाहकांनी स्वतःच्या जीवाची पर्वा ना करता तात्काळ बॅटरीचा कक्ष उघडून मुख्य सप्लाय कीट बाहेर काढले. त्यांच्या या समयसूचकतेमुळे पुढील संभाव्य भीषण दुर्घटना आणि आग लागण्याचा धोका टळला. स्फोटाची तीव्रता इतकी जास्त होती की बॅटरीच्या अंतर्गत भागाचे तुकडे झाले होते.
‘टकाटक’ गाड्यांच्या निकृष्ट सुट्या भागांवर प्रवाशांचे प्रश्नचिन्ह
एसटी महामंडळाकडून “प्रवाशांच्या सेवेला नवीन टकाटक गाड्या आणल्या आहेत,” असा दावा सातत्याने केला जातो. मात्र, बाहेरून नवीन दिसणाऱ्या या गाड्यांची अंतर्गत तांत्रिक स्थिती किती खालावलेली आहे, हे या घटनेने सिद्ध केले आहे. कोट्यावधी रुपये खर्च करून आणलेल्या नव्या कोऱ्या गाडीची बॅटरी अचानक फुटतेच कशी, असा थेट सवाल प्रवाशांनी उपस्थित केला आहे. महामंडळात निकृष्ट दर्जाचे सुटे भाग वापरून प्रवाशांच्या जिवाशी खेळ सुरू असल्याचा आरोप आता प्रवाशांकडून केला जात आहे.
मध्यवर्ती संगमेश्वर स्थानकाची शोकांतिका: एकही कायमस्वरूपी मेकॅनिक नाही
भौगोलिकदृष्ट्या संगमेश्वर हे मुंबई-गोवा महामार्गावरील अत्यंत महत्त्वाचे आणि मध्यवर्ती ठिकाण आहे. रत्नागिरी, सिंधुदुर्गसह मुंबई, पुणे, कोल्हापूर अशा विविध मार्गांवरील शेकडो एसटी बसेस दररोज या स्थानकातून ये-जा करतात. शासनाने येथे कोट्यावधी रुपये खर्च करून सुसज्ज आणि भव्य बस स्थानक इमारत उभारली आहे, मात्र गाड्यांची तांत्रिक दुरुस्ती करण्यासाठी येथे हक्काचा ‘एकही कायमस्वरूपी मेकॅनिक’ उपलब्ध ठेवलेला नाही. ही या भागातील प्रवाशांची सर्वात मोठी शोकांतिका ठरत आहे.
मेकॅनिकसाठी देवरुखवर अवलंबित्व; महिला व बालकांचे रात्रीचे हाल
सध्याच्या नियमांनुसार संगमेश्वर स्थानकात किंवा महामार्गावर जवळपास कुठेही एसटी बसमध्ये बिघाड झाला, तर चालक-वाहकाला देवरुख आगाराशी संपर्क साधावा लागतो. देवरुखवरून मेकॅनिक आणि दुरुस्तीचे साहित्य संगमेश्वरला येईपर्यंत १ ते २ तास सहज निघून जातात. रविवारी रात्रीच्या घटनेनंतरही हाच प्रकार घडला. चालक-वाहकांनी माहिती दिल्यानंतर देवरुखवरून दुसरी बॅटरी आणि तांत्रिक कर्मचारी येईपर्यंत प्रवाशांना रात्रीच्या वेळी ताटकळत राहावे लागले. यामध्ये लहान मुले, वृद्ध आणि महिला प्रवाशांचे कमालीचे हाल झाले.
२४ तास कायमस्वरूपी मेकॅनिक नियुक्त करण्याची जनतेची मागणी
संगमेश्वर स्थानकातील वाढती वाहतूक पाहता या ठिकाणी आगार आवारात २४ तास कायमस्वरूपी मेकॅनिक आणि आवश्यक तांत्रिक साहित्याची उपलब्धता असावी, अशी मागणी स्थानिक नागरिक आणि प्रवासी वर्ग अनेक वर्षांपासून करत आहेत. मात्र, प्रशासनाच्या अक्षम्य दुर्लक्षामुळे एका गाडीतील बिघाडामुळे शेकडो प्रवाशांना मनस्ताप सहन करावा लागत आहे. महामंडळाने या समस्येची तातडीने दखल घेऊन कायमस्वरूपी मेकॅनिक नियुक्त करावा, अन्यथा तीव्र आंदोलनाचा इशारा जनतेने दिला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:26 15-06-2026
