गुहागर पोलिसांत अकस्मात मृत्यूची नोंद
गुहागर:
गुहागर खाडीत पोहताना उतरलेल्या एका ३५ वर्षीय तरुणाचा पाण्यात बुडून मृत्यू झाल्याची अत्यंत हृदयद्रावक घटना घडली आहे. संजोग शशिकांत सुर्वे (वय ३५ वर्षे, रा. पडवे भंडारवाडा, ता. गुहागर) असे या दुर्दैवी मृत तरुणाचे नाव आहे. ही घटना सोमवार, १५ जून रोजी दुपारच्या सुमारास गुहागर तालुक्यातील तवसाळ येथे घडली. या दुर्घटनेमुळे पडवे परिसरासह संपूर्ण तालुक्यात हळहळ व्यक्त होत आहे.
मित्रांसोबत गेले होते फिरण्यासाठी
पोलीस सूत्रांकडून मिळालेल्या अधिकृत माहितीनुसार, सोमवारी दुपारी संजोग सुर्वे हे त्यांचे मित्र निखिल सुर्वे, विनायक गडदे आणि अक्षय सुर्वे यांच्यासोबत तवसाळ परिसरात फिरण्यासाठी गेले होते. या चौघा मित्रांनी परिसरात काही वेळ फिरून एकत्र जेवण केले. त्यानंतर दुपारी मौजे पडवे तवसाळ येथील महामाई सोनसाखळी गावदेवी मंदिरालगत असलेल्या खाडीच्या पात्रात हे सर्वजण पोहण्यासाठी उतरले.
पाण्यात खाल्ल्या गटांगळ्या, मित्रांनी केला वाचवण्याचा प्रयत्न
खाडीत पोहत असताना संजोग सुर्वे हे अचानक पाण्याचा अंदाज न आल्याने गटांगळ्या खाऊ लागले आणि पाण्यात बुडू लागले. हा प्रकार लक्षात येताच त्यांच्यासोबत असलेल्या मित्रांनी तत्परता दाखवून तातडीने त्यांना पाण्याच्या बाहेर काढले. खाडीबाहेर काढल्यानंतर संजोग यांच्या नाका-तोंडातून फेस येत असल्याचे मित्रांच्या निदर्शनास आले. यावेळी मित्र अक्षय सुर्वे याने त्यांना तात्काळ कृत्रिम श्वास (सीपीआर) देऊन शुद्धीवर आणण्याचा आटोकाट प्रयत्न केला, मात्र संजोग यांच्या शरीराकडून कोणतीही हालचाल झाली नाही.
उपचारापूर्वीच प्राणज्योत मालवली
संजोग यांची प्रकृती गंभीर असल्याचे पाहून मित्रांनी तातडीने रुग्णवाहिका बोलावून त्यांना हेदवी येथील सरकारी दवाखान्यात हलवले. तेथील डॉक्टरांनी प्रथमोपचार करून पुढील तातडीच्या उपचारांसाठी त्यांना आबलोली येथील प्राथमिक आरोग्य केंद्रात नेण्याचा सल्ला दिला. डॉक्टरांच्या सल्ल्यानुसार त्यांना तातडीने आबलोली आरोग्य केंद्रात दाखल करण्यात आले, मात्र तेथील वैद्यकीय अधिकाऱ्यांनी तपासणी करून संजोग सुर्वे यांना दाखल करण्यापूर्वीच मृत घोषित केले.
गुहागर पोलिसांत अकस्मात मृत्यूची नोंद
या संपूर्ण दुर्दैवी घटनेप्रकरणी गुहागर पोलीस ठाण्यात अकस्मात मृत्यू (आमृ. क्रमांक २३/२०२६) म्हणून भारतीय नागरिक सुरक्षा संहिता (BNSS) कलम १९४ नुसार नोंद करण्यात आली आहे. घटनेची माहिती मिळताच पोलिसांनी मृतदेहाचा पंचनामा केला असून, या प्रकरणाचा पुढील अधिक तपास गुहागर पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:45 17-06-2026
