चिपळूण: Chiplun House Theft Case | कौटुंबिक नातेसंबंधांना तडा देणारी एक अत्यंत धक्कादायक आणि संतापजनक घटना चिपळूण शहरात उघडकीस आली आहे. स्वतःच्या सासूच्या बंद घराचा गैरफायदा घेत सुनेनेच कपाटात ठेवलेले तब्बल दोन लाख रुपयांहून अधिक किमतीचे सोन्याचे दागिने चोरून नेल्याचा प्रकार समोर आला आहे. याप्रकरणी सासूने दिलेल्या तक्रारीवरून चिपळूण पोलिसांनी तातडीने कारवाई करत संशयित सुनेविरुद्ध घरफोडी आणि चोरीचा रीतसर गुन्हा दाखल केला आहे.
पाग कासकरआळी येथील ‘शाबीरा मंझील’मधील घटना
चिपळूण पोलिसांनी दिलेल्या माहितीनुसार, शहरातील पाग कासकरआळी परिसरातील ‘शाबीरा मंझील’ येथे राहणाऱ्या नईमा रफिक झारे (वय ५९ वर्षे) यांनी याप्रकरणी चिपळूण पोलीस ठाण्यात अधिकृत फिर्याद दिली आहे. त्यांच्या फिर्यादीवरून त्यांची सून सानिया फारुख झारे (वय १८ वर्षे) हिच्याविरुद्ध घरफोडीचा गुन्हा नोंदविण्यात आला आहे. हा संपूर्ण चोरीचा प्रकार ५ जून रोजी रात्री ८ वाजल्यापासून ते १४ जून रोजी दुपारी १ वाजेपर्यंतच्या कालावधीत घडल्याचे पोलिसांत दाखल तक्रारीत म्हटले आहे.
कपाटातून २ लाख आठ हजार रुपयांचा ऐवज लंपास
फिर्यादी नईमा झारे या काही कामानिमित्त घराबाहेर गेल्या असल्याचा गैरफायदा संशयित सून सानिया झारे हिने घेतला. तिने सासूच्या परवानगीशिवाय बंद घरात प्रवेश केला. त्यानंतर मुख्य बेडरूमचा दरवाजा उघडून आत असलेल्या कपाटातील सोन्याच्या दागिन्यांवर हात साफ केला. चोरीस गेलेल्या एकूण ऐवजामध्ये ९.१८० ग्रॅम वजनाचा मौल्यवान सोन्याचा नेकलेस, दोन सोन्याच्या अंगठ्या आणि नाकातील सोन्याची पुली असा एकूण २ लाख ८ हजार ९१७ रुपयांचा मुद्देमाल समाविष्ट आहे.
चिपळूण पोलिसांत गुन्हा नोंद; तपासाचे चक्र सुरू
घर परतल्यानंतर कपाटातील दागिने गायब असल्याचे नईमा झारे यांच्या निदर्शनास आले. घरातील व्यक्तीकडेच संशयाची सुई गेल्याने त्यांनी अखेर १६ जून रोजी चिपळूण पोलीस ठाणे गाठून फिर्याद दिली. त्यानुसार पोलिसांनी गुन्हा रजिस्टर क्रमांक १७७/२०२६ अन्वये भारतीय न्याय संहिता (BNS) च्या संबंधित कायदेशीर कलमांखाली गुन्हा दाखल केला आहे. हा प्रकार निव्वळ कौटुंबिक वादातून घडला की यामागे आणखी काही कारण आहे, याचा सखोल तपास चिपळूण पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:51 18-06-2026
