उद्योगमंत्री उदय सामंत यांच्या प्रयत्नांना यश; ९५ हेक्टर जमिनीसाठी आवश्यक १२२० कोटींपैकी पहिला हप्ता जिल्हा प्रशासनाकडे सुपूर्द
Nivendi MIDC Land Acquisition: रत्नागिरी तालुक्यातील निवेंडी येथे प्रस्तावित औद्योगिक विकास महामंडळाच्या (एमआयडीसी) भूसंपादनाचा रखडलेला प्रश्न अखेर मार्गी लागला आहे. निधीअभावी थबकलेल्या या प्रक्रियेला आता गती मिळाली असून, शासनाकडून ९५ हेक्टर जमिनीच्या भूसंपादनासाठी आवश्यक १२२० कोटी रुपयांपैकी ६० कोटींचा पहिला टप्पा जिल्हा प्रशासनाला प्राप्त झाला आहे. यामुळे निवेंडी एमआयडीसीच्या उभारणीचा मार्ग मोकळा झाला असून प्रशासकीय पातळीवर पुढील हालचालींना वेग आला आहे.
निवेंडी एमआयडीसीची पार्श्वभूमी आणि जागेची पाहणी
विधानसभा निवडणुकीपूर्वी राज्य शासनाकडून निवेंडी येथे एमआयडीसी उभारण्याची घोषणा करण्यात आली होती. त्या कालावधीत निवेंडी पंचक्रोशीतील जमिनींची मोजणी पूर्ण करून भूसंपादनाची प्राथमिक प्रक्रिया राबवण्यात आली होती. सुरुवातीला १०५ हेक्टर जागेचे भूसंपादन करण्याचे नियोजन होते; मात्र आता सुधारित आराखड्यानुसार ९५ हेक्टर क्षेत्रावर ही एमआयडीसी उभारण्याच्या हालचाली सुरू आहेत.
Nivendi MIDC Land Acquisition: फलप्रक्रिया उद्योग आणि रोजगाराची संधी
या प्रकल्पासाठी राज्याचे उद्योगमंत्री तथा रत्नागिरी जिल्ह्याचे पालकमंत्री व स्थानिक आमदार उदय सामंत विशेष प्रयत्नशील आहेत. रत्नागिरी जिल्ह्यात मोठ्या प्रमाणात आंबा आणि काजूचे उत्पादन घेतले जाते. या स्थानिक उत्पादनांवर प्रक्रिया करणारे मोठे प्रकल्प निवेंडी एमआयडीसीमध्ये यावेत, यासाठी विशेष भर दिला जात आहे. येथे फलप्रक्रिया उद्योग सुरू झाल्यास स्थानिक तरुणांना रोजगाराच्या नवीन संधी उपलब्ध होतील, तसेच आंबा, काजू आणि कोकणी मेव्याला योग्य बाजारभाव मिळण्यास मदत होईल.
निधीचा प्रश्न सुटल्याने भूसंपादनाला गती
गेल्या दोन वर्षांपासून केवळ निधी उपलब्ध नसल्यामुळे भूसंपादनाची प्रक्रिया रखडली होती. आता शासनाने यासाठी निधी वितरित करण्यास सुरुवात केली आहे. एकूण १२२० कोटींच्या अपेक्षित खर्चापैकी ६० कोटी रुपये जिल्हा प्रशासनाला उपलब्ध झाल्यामुळे प्रत्यक्षात भूसंपादनाची पावले वेगाने पडू लागली आहेत. या विकासकामामुळे निवेंडी परिसराच्या आर्थिक प्रगतीला मोठा हातभार लागण्याची अपेक्षा आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:12 27-07-2026
