Mirabai Chanu Gold Medal ची ऐतिहासिक हॅटट्रिक: ग्लासगो राष्ट्रकुल स्पर्धा २०२६ मध्ये नवीन विक्रमासह सुवर्णवेध
ग्लासगो:
भारताची स्टार वेटलिफ्टर मीराबाई चानू हिने पुन्हा एकदा आंतरराष्ट्रीय स्तरावर भारताची मान अभिमानाने उंचावली आहे. राष्ट्रकुल क्रीडा स्पर्धा २०२६ (Commonwealth Games 2026) मध्ये महिलांच्या ४८ किलो वजनी गटात आपल्या उत्कृष्ट कामगिरीच्या बळावर तिने भारताला पहिले सुवर्णपदक मिळवून दिले आहे. राष्ट्रकुल स्पर्धेच्या इतिहासातील तिचे हे सलग तिसरे सुवर्णपदक ठरले असून, या ऐतिहासिक कामगिरीसह तिने नव्या विक्रमाला गवसणी घातली आहे.
१९० किलो वजन उचलून रचला इतिहास; सलग तिसरे सुवर्ण
ग्लासगो येथे पार पडत असलेल्या राष्ट्रकुल क्रीडा स्पर्धेत मीराबाई चानूने महिलांच्या ४८ किलो वजनी गटात एकूण १९० किलोग्रॅम वजन उचलत अव्वल स्थान पटकावले. यापूर्वी मीराबाईने २०१८ मधील गोल्ड कोस्ट आणि २०२२ मधील बर्मिंघम राष्ट्रकुल स्पर्धेत भारताला सुवर्णपदक मिळवून दिले होते. यंदाही आपल्या पदकाचा रंग सुवर्ण ठेवणीत ठेवत तिने राष्ट्रकुल स्पर्धेत सुवर्णपदकाची हॅटट्रिक साजरी केली आहे.
स्नॅच फेरीत नवा विक्रम; क्लीन अँड जर्कमध्ये १०५ किलोचे वजन
मीराबाईने यंदाचे सुवर्णपदक एका नव्या विक्रमासह आपल्या नावावर केले. स्नॅच फेरीची सुरुवात काहीशी खराब झाली असली तरीही तिने जोरदार पुनरागमन केले. दुसऱ्या प्रयत्नात ८२ किलो आणि अंतिम प्रयत्नात ८५ किलो वजन उचलून तिने राष्ट्रकुल स्पर्धेतील नवा विक्रम प्रस्थापित केला. यानंतर क्लीन अँड जर्क फेरीत १०५ किलो वजन उचलून एकूण १९० किलो वजनासह तिने आपले सुवर्णपदक पक्के केले.
संघर्षमय प्रवास आणि देदीप्यमान यश
वयाच्या अवघ्या १३ व्या वर्षापासून वेटलिफ्टिंगची तयारी करणाऱ्या मीराबाई चानूला सुरुवातीच्या काळात अत्यंत प्रतिकूल आर्थिक परिस्थितीचा सामना करावा लागला होता. योग्य आहार आणि डाएट फॉलो करणेही कठीण असताना तिने सर्व अडचणींवर मात केली. यापूर्वी २०२० च्या टोकियो ऑलिम्पिक स्पर्धेत तिने भारताला रौप्यपदक मिळवून दिले होते, तर पॅरिस ऑलिम्पिकमध्ये तिला चौथ्या स्थानावर समाधान मानावे लागले होते. मात्र, ग्लासगो येथे पुन्हा एकदा ऐतिहासिक कामगिरी करत तिने भारताचा नावलौकिक वाढवला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:15 27-07-2026
