चिपळूण अपघातात पादचाऱ्याचा मृत्यू, बेदरकार दुचाकीस्वारावर गुन्हा दाखल
चिपळूण अपघातात पादचाऱ्याचा मृत्यू झाल्याची दुर्दैवी घटना कराड-गुहागर महामार्गावरील बहादूरशेख नाका परिसरात घडली आहे. २५ जुलै २०२६ रोजी सायंकाळी साडेसहा वाजण्याच्या सुमारास हा अपघात झाला. या अपघातात गंभीर जखमी झालेल्या खेड तालुक्यातील वृद्धाचा उपचारादरम्यान मृत्यू झाला असून, याप्रकरणी चिपळूण पोलीस ठाण्यात अल्पवयीन दुचाकी चालकाविरोधात गुन्हा दाखल करण्यात आला आहे.
मिळालेल्या अधिकृत माहितीनुसार, मन्मथ मिलिंद कुंभार (वय १७, रा. खेर्डी शिवाजीनगर, ता. चिपळूण) हा आपली दुचाकी (क्रमांक MH-08-AJ-6492) बेदरकारपणे आणि निष्काळजीपणे चालवत होता. कराड-गुहागर महामार्गावर एस.एम.एस. बॅटरी दुकानासमोरून रस्ता ओलांडणाऱ्या भास्कर पुंजाजी कोळी (रा. मुसाड सुर्वेवाडी, ता. खेड, जि. रत्नागिरी) या पादचाऱ्याला दुचाकीने जोरदार धडक दिली. धडक इतकी भीषण होती की भास्कर कोळी महामार्गावर कोसळून गंभीर जखमी झाले.
अपघाताची माहिती मिळताच स्थानिक नागरिकांच्या मदतीने जखमी भास्कर कोळी यांना तातडीने उपचारासाठी रुग्णालयात दाखल करण्यात आले. मात्र, गंभीर दुखापत झाल्यामुळे उपचारादरम्यान त्यांची प्राणज्योत मालवली. या अपघातात दुचाकी चालक मन्मथ कुंभार हादेखील जखमी झाला असून त्याच्यावरही वैद्यकीय उपचार सुरू आहेत. महामार्गावरील गजबजलेल्या बहादूरशेख नाका परिसरात हा अपघात घडल्याने वाहतुकीवरही काही काळ परिणाम झाला होता.
या प्रकरणी रघुनाथ राजाराम सुर्वे (वय ३२, रा. कळंबस्ते, ता. चिपळूण) यांनी चिपळूण पोलीस ठाण्यात तक्रार नोंदवली आहे. दिलेल्या फिर्यादीवरून पोलिसांनी २६ जुलै २०२६ रोजी पहाटे अल्पवयीन चालक मन्मथ कुंभार याच्याविरुद्ध कायदेशीर कारवाई केली आहे. चालकावर भारतीय न्यायसंहिता (BNS) २०२३ चे कलम १०६(१), २८१, १२५(अ), १२५(ब) आणि मोटार वाहन कायद्याच्या कलम १८४ अंतर्गत गुन्हा दाखल करण्यात आला आहे.
रत्नागिरी जिल्ह्यातील महामार्गांवर विशेषतः चिपळूण शहरातील बहादूरशेख नाका परिसरात वाहतुकीची मोठी वर्दळ असते. या भागात दुचाकीस्वारांकडून होणारा वेगाचा अतिरेक आणि अल्पवयीन चालकांचे बेजबाबदारपणे वाहन चालवणे यामुळे वारंवार धोके निर्माण होत आहेत. या दुर्दैवी घटनेनंतर पोलिसांनी अल्पवयीन चालकांवर आणि वेगमर्यादा ओलांडणाऱ्यांवर कडक कारवाईचे संकेत दिले असून, चिपळूण पोलीस ठाण्याचे अधिकारी या प्रकरणाचा पुढील तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:46 28-07-2026
