प्रशासनाकडून स्थलांतराच्या सूचना; मात्र पर्यायी व्यवस्थेअभावी ग्रामस्थ भीतीच्या छायेखालीच वास्तव्यास
चिपळूण (रत्नागिरी) : Tiware Landslide Threat मुळे चिपळूण तालुक्यातील सह्याद्रीच्या कुशीत वसलेले तिवरे गाव पुन्हा एकदा मोठ्या नैसर्गिक आपत्तीच्या छायेखाली आले आहे. सध्या सुरू असलेल्या अतिवृष्टीमुळे तिवरे गावठाण परिसरातील डोंगराला मोठ्या प्रमाणात भेगा पडल्या असून, काही भाग खचल्याची धक्कादायक बाब समोर आली आहे. यामुळे परिसरातील सुमारे १५० घरांना थेट धोका निर्माण झाला आहे. खबरदारीचा उपाय म्हणून प्रशासनाने स्थानिक नागरिकांना तातडीने स्थलांतरित होण्याच्या सूचना दिल्या आहेत.
पर्यायी व्यवस्थेअभावी ग्रामस्थ त्याच ठिकाणी राहण्यास मजबूर
प्रशासनाने सुरक्षित स्थळी हलण्याचे निर्देश दिले असले, तरी अद्याप पुनर्वसन अथवा राहण्याची योग्य पर्यायी व्यवस्था झालेली नाही. त्यामुळे कोणत्याही क्षणी डोंगर कोसळण्याच्या भीतीखालीच ग्रामस्थांना त्याच धोकादायक ठिकाणी वास्तव्य करावे लागत आहे. कायमस्वरूपी उपाययोजना आणि निवाऱ्याची सोय न झाल्याने स्थानिक रहिवाशांमध्ये चिंतेचे वातावरण पसरले आहे.
२०१९ च्या तिवरे धरण दुर्घटनेच्या जखमा अजूनही ताज्या
तिवरे गावाला नैसर्गिक आपत्तींचा मोठा आणि वेदनादायी इतिहास आहे. २०१९ मध्ये घडलेली तिवरे धरण फुटण्याची घटना अजूनही संपूर्ण महाराष्ट्राच्या स्मरणात आहे. त्या दुर्घटनेत तिवरे भेंदवाडी पाण्याखाली वाहून गेली होती आणि २२ जणांना आपला जीव गमवावा लागला होता. या भीषण दुर्घटनेच्या आधीपासूनच या संपूर्ण परिसरात भूस्खलनाच्या घटना वारंवार घडत आहेत. दरवर्षी अतिवृष्टीदरम्यान डोंगराला भेगा पडणे आणि डोंगर खचणे असे प्रकार नियमित घडत आहेत.
भूगर्भशास्त्रज्ञांच्या पाहणीनंतरही परिस्थिती जैसे थे; तातडीच्या उपाययोजनांची मागणी
यापूर्वी डोंगराला पडलेल्या भेगांची भूगर्भशास्त्रज्ञांमार्फत सखोल पाहणी करण्यात आली होती. मात्र, यावर्षी पावसाळ्यात पुन्हा एकदा तिवरे गावठाण येथील डोंगराला तडे गेले असून जमीन खचली आहे. स्थानिक ग्रामस्थ प्रकाश शिंदे यांनी प्रशासनाने व शासनाने या गंभीर परिस्थितीची तात्काळ दखल घेऊन कायमस्वरूपी उपाययोजना कराव्यात, अशी जोरदार मागणी केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:32 29-07-2026
