जंतर-मंतर आंदोलनानंतर शिक्षणमंत्र्यांच्या राजीनाम्यामुळे पेटला राजकीय वाद; कंगनाच्या इन्स्टा स्टोरीवरून सिजीपीचा तीव्र पलटवार
नवी दिल्ली : CJP On Kangana Ranaut Gutter Generation Comment संदर्भात एक मोठी राजकीय घडामोडी समोर आली आहे. दिल्लीतील जंतर-मंतर येथे झालेल्या तीव्र आंदोलनानंतर केंद्र सरकारला नमते घ्यावे लागले असून तत्कालीन शिक्षणमंत्री धर्मेंद्र प्रधान यांना आपल्या मंत्रिपदाचा राजीनामा द्यावा लागला. या घडामोडीनंतर हिमाचल प्रदेशातील मंडी मतदारसंघातील भाजप खासदार कंगना रनौत यांनी सोशल मीडियावर आंदोलक ‘जेन-झी’ (Gen-Z) तरुणांवर अत्यंत वादग्रस्त टीका केली आहे. कंगनाच्या या टीकेला कॉकरोच जनता पार्टीने (CJP) रोखठोक प्रत्युत्तर दिले आहे.
कंगनापेक्षा ‘जनरेशन झेड’चे देशासाठी योगदान अधिक : सीजेपी
कंगना रनौतच्या वादग्रस्त विधानानंतर कॉकरोच जनता पार्टीचे (CJP) प्रवक्ते सौरव दास यांनी अधिकृत निवेदन जारी करत तिच्यावर जोरदार निशाणा साधला. सौरव दास म्हणाले की, “कंगना रनौतच्या तुलनेत ‘जनरेशन झेड’ने देशासाठी कितीतरी पटीने जास्त काम केले आहे आणि ते अजूनही करत आहेत. या तरुणांनी देशातील लोकशाहीवरील जनतेचा विश्वास पुन्हा दृढ केला आहे. जी गोष्ट करण्यात स्वतः कंगना अपयशी ठरली, ती गोष्ट या तरुणांनी करून दाखवली आहे. त्यामुळे या पिढीबद्दल बोलताना तिने भान राखले पाहिजे.” तसेच कंगनामध्ये गांभीर्याचा अभाव असून तिचा स्वतःचा पक्षही तिला गांभीर्याने घेत नाही, असा टोलाही त्यांनी लगावला.
कंगना रनौतचे ‘जनरेशन गटार’ आणि संस्कारांवर प्रश्नचिन्ह लावणारे वक्तव्य
जंतर-मंतर येथे निदर्शने करणाऱ्या तरुणांना कंगनाने इन्स्टाग्राम स्टोरीवर ‘जेन-झी’ ऐवजी ‘जनरेशन गटार’ (Generation Gutter) असे संबोधले. आंदोलनादरम्यान तरुणांनी वापरलेली भाषा अत्यंत ‘मळमळ आणणारी’ आणि ‘असंस्कृत’ असल्याचे सांगत तिने त्यांच्या संस्कारांवरच प्रश्न उपस्थित केले. “या लोकांना कोण जन्म देते आणि त्यांचे संगोपन कसे केले जाते? भारत हा संस्कृती आणि सभ्यतेवर आधारित देश आहे. तुम्ही स्वतःला झुरळे म्हणवून घेता आणि तसेच वागता,” असे लिहीत या रील्स पाहून अस्वस्थ वाटल्याने आपल्याला ‘डिजिटल डिटॉक्स’ची गरज असल्याचे तिने म्हटले.
हिंदू तरुणींच्या जीवनशैलीवरही कंगनाची वादग्रस्त टीका
आंदोलनात सहभागी झालेल्या तरुणींवर निशाणा साधताना कंगनाने दावा केला की, अमली पदार्थांचे सेवन, मद्यपान आणि पालकांच्या कमाईवर जगणे यालाच त्या ‘स्वातंत्र्य’ मानतात. यातील अनेकांचे समाजात किंवा व्यवस्थेत कोणतेही योगदान नाही. इतकेच नव्हे तर या तरुणी इतक्या बिघडलेल्या आहेत की त्या भविष्यात चांगल्या गृहिणीही बनू शकत नाहीत, असे अजब विधान कंगनाने केले आहे. कंगनाच्या या वक्तव्यांमुळे देशभरातील तरुणाईमध्ये आणि राजकीय वर्तुळात नवा वाद पेटला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:32 29-07-2026
