घरगुती वादानंतर बेपत्ता झालेल्या प्रदीप गमरे यांचा जयगड खाडीच्या खडकात सापडला मृतदेह
गुहागर आंबेरे खुर्द येथील जयगड खाडीच्या किनारी असलेल्या खडकामध्ये २५ ते २७ जुलै दरम्यान ५६ वर्षीय प्रदीप शिवराम गमरे यांचा मृतदेह आढळल्याची घटना समोर आली आहे. घरगुती वादानंतर घरातून निघून गेलेल्या गमरे यांचा मृतदेह खाडीकिनारी निष्प्राण अवस्थेत मिळून आल्याने आंबेरे खुर्द बौद्धवाडी परिसरात हळहळ व्यक्त होत आहे. या प्रकरणी गुहागर पोलीस ठाण्यात सध्या आकस्मिक मृत्यूची नोंद करण्यात आली असून पोलीस पुढील कायदेशीर तपास करत आहेत.
घरगुती वादानंतर शोधाशोध सुरू
मिळालेल्या माहितीनुसार, मृत प्रदीप शिवराम गमरे (वय ५६, रा. आंबेरे खुर्द बौद्धवाडी, ता. गुहागर) हे दारूच्या नशेत घरात विनाकारण वाद घालायचे. घटनेच्या दिवशीही त्यांचा घरात कौटुंबिक वाद झाला आणि ते रागाच्या भरात घर सोडून निघून गेले. बराच वेळ उलटूनही ते घरी परत न आल्याने कुटुंबीय आणि ग्रामस्थांची काळजी वाढली.
जयगड खाडीकिनारी खडकात आढळला मृतदेह
प्रदीप गमरे घरी न परतल्यामुळे त्यांचे मुलगे आणि फिर्यादी पंकज प्रदीप गमरे यांनी वाडीतील ग्रामस्थांच्या मदतीने परिसर आणि गावात शोधमोहीम सुरू केली. २५ जुलै रोजी रात्री ९ वाजल्यापासून सुरू असलेल्या या शोधादरम्यान, २७ जुलै रोजी दुपारी ४:१७ वाजेच्या सुमारास आंबेरे खुर्द बौद्धवाडी येथील जयगड खाडीच्या किनारी असलेल्या खडकामध्ये प्रदीप गमरे यांचा मृतदेह निष्प्राण व संशयास्पद अवस्थेत आढळून आला.
गुहागर आंबेरे खुर्द घटनेबाबत पोलिसांत नोंद आणि पुढील कारवाई
घटनेचे गांभीर्य लक्षात घेऊन तात्काळ गुहागर पोलीस ठाण्याशी संपर्क साधून माहिती देण्यात आली. २७ जुलै रोजी सायंकाळी ५:३३ वाजता गुहागर पोलिसांनी या प्रकरणी आकस्मिक मृत्यूची नोंद केली आहे. घटनेचा पंचनामा करून मृतदेह ताब्यात घेण्यात आला असून, या घटनेचा पुढील सखोल तपास गुहागर पोलीस ठाण्याचे अधिकारी करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:47 29-07-2026
