बोगस प्रवास रोखण्यासाठी एसटी महामंडळाचा मोठा निर्णय; स्मार्ट कार्ड नसेल तर सवलत होणार बंद
रत्नागिरी : Ratnagiri NCMC Smart Card संदर्भात रत्नागिरी जिल्ह्यात नॅशनल कॉमन मोबिलिटी (NCMC) स्मार्ट कार्ड काढण्यासाठी विविध बसस्थानकांवर नागरिकांची मोठी गर्दी पाहायला मिळत आहे. आजखेर संपूर्ण जिल्ह्यात सुमारे पावणेदोन लाख सवलतधारकांनी हे स्मार्ट कार्ड काढून घेतले आहे. येत्या १ सप्टेंबरपासून प्रवासासाठी हे स्मार्ट कार्ड पूर्णपणे बंधनकारक करण्यात येणार असून, कार्ड नसल्यास ज्येष्ठ नागरिक व महिलांना प्रवास सवलत मिळणे बंद होणार आहे.
बोगस ओळखपत्रे दाखवून एसटी प्रवासात सवलतीचा गैरफायदा घेणाऱ्यांना चाप बसवण्यासाठी महाराष्ट्र राज्य मार्ग परिवहन महामंडळाने (MSRTC) आता सवलतधारकांसाठी एनसीएमसी (NCMC) कार्ड अनिवार्य केले आहे. गेल्या चार महिन्यांपासून रत्नागिरी विभागात या कार्डांची नोंदणी प्रक्रिया सुरू आहे. रत्नागिरीसह जिल्ह्यातील विविध बसस्थानकांवर दररोज सकाळी ९:३० ते सायंकाळी ५ या वेळेत ही नोंदणी सुरू असून कार्ड काढण्यासाठी प्रवाशांचा मोठा प्रतिसाद मिळत आहे.
आकडेवारीवर एक नजर:
- एकूण सवलतधारक: ७ लाख
- आतापर्यंत झालेली नोंदणी: पावणेदोन लाख
- रत्नागिरी शहरातील नोंदणी: १७ हजार
- प्रलंबित नोंदणी: सव्वापाच लाख
जिल्ह्यात अजूनही सुमारे ५.२५ लाख (सव्वापाच लाख) सवलतधारकांनी कार्ड काढलेले नाही. त्यामुळे १ सप्टेंबरपूर्वी सर्व पात्र लाभार्थ्यांनी, विशेषतः ज्येष्ठ नागरिक आणि महिलांनी, जवळच्या बसस्थानकावर जाऊन आपले एनसीएमसी स्मार्ट कार्ड त्वरित काढून घ्यावे, असे आवाहन एसटी प्रशासनाकडून करण्यात आले आहे.
“रत्नागिरी बसस्थानकात एनसीएमसी कार्ड काढण्यासाठी प्रवाशांची गर्दी होत आहे. आतापर्यंत १७ हजार कार्ड्सची नोंदणी झाली असून जिल्ह्यात पावणेदोन लाख जणांनी हे कार्ड काढले आहे. १ सप्टेंबरपासून सवलत बंद होण्याची शक्यता असल्याने प्रवाशांनी लवकरात लवकर स्मार्ट कार्ड काढून घ्यावे.” — संदीप चव्हाण (एजंट, एनसीएमसी कार्ड, रत्नागिरी)
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:05 30-07-2026
