स्थानिक गुन्हे अन्वेषण शाखेची धडक कारवाई; रोख रक्कमेसह मटका जुगाराचे साहित्य जप्त
रत्नागिरी जिल्ह्यातील राजापूर तालुक्यातील नाटे पोलीस ठाण्याच्या हद्दीत मटका जुगारावर पोलिसांनी धडक कारवाई केली आहे. तुळसुंदे फाटा येथील एका पडक्या शेडजवळ बेकायदेशीरपणे मटका जुगार खेळवणाऱ्या एका इसमाला पोलिसांनी रंगेहाथ पकडले असून, त्याच्याविरोधात नाटे पोलीस ठाण्यात गुन्हा दाखल करण्यात आला आहे.
गुन्हे अन्वेषण शाखेची गुप्त माहितीच्या आधारे कारवाई
स्थानिक गुन्हे अन्वेषण शाखा, रत्नागिरी येथील पोलीस अंमलदार विक्रम अंबाजी पाटील आणि त्यांच्या पथकाने गुरुवारी सायंकाळी ही कारवाई केली. राजापूर तालुक्यातील तुळसुंदे फाटा येथील नार्वेकर किराणा दुकानाच्या पाठीमागे असलेल्या एका पडक्या शेडजवळ एक इसम बेकायदेशीरपणे मुंबई मटका जुगार चालवत असल्याची गुप्त माहिती पोलिसांना मिळाली होती.
रंगेहाथ पकडत मुद्देमाल केला जप्त
प्राप्त माहितीच्या आधारे पोलिसांनी सायंकाळी ७:३६ वाजेच्या सुमारास घटनास्थळी छापा टाकला. त्यावेळी आरोपी विशाल अशोक सुर्वे (वय ३८ वर्षे, रा. तुळसुंदे उगवतीवाडी नाटे, ता. राजापूर) हा विनापरवाना मुंबई मटका जुगाराचा खेळ खेळवताना मिळून आला. पोलिसांनी त्याच्या तावडीतून १२१० रुपयांची रोख रक्कम आणि मटका जुगाराचे साहित्य असा एकूण १२१५ रुपये किमतीचा मुद्देमाल जप्त केला आहे.
नाटे पोलीस ठाण्यात गुन्हा दाखल
या प्रकरणी पोलीस अंमलदार विक्रम पाटील यांनी दिलेल्या फिर्यादीवरून नाटे पोलीस ठाण्यात आरोपी विशाल सुर्वे याच्याविरोधात महाराष्ट्र जुगार कायदा कलम १२ (अ) अन्वये गु.र.नं. ७५/२०२६ नुसार गुन्हा नोंदवण्यात आला आहे. अवैध धंद्यांविरोधात पोलिसांनी सुरू केलेल्या या कारवाईमुळे जुगार चालकांचे धाबे दणाणले असून, पोलीस अधिक तपास करत आहेत.
