मारुती मंदिर शाखेतील बचत खात्यावरून भामट्याने लांबवली लाखांची रक्कम; पोलिसांत गुन्हा दाखल
रत्नागिरी: रत्नागिरीत सायबर फसवणूकची एक मोठी घटना समोर आली असून, बँक ऑफ इंडियाच्या मारुती मंदिर शाखेतील एका ग्राहकाच्या खात्यावरून अज्ञात भामट्याने तब्बल ५ लाख ८६ हजार ९ रुपये ऑनलाइन पद्धतीने परस्पर काढून घेतले आहेत. २५ जुलै रोजी अवघ्या तासाभराच्या कालावधीत ही मोठी आर्थिक फसवणूक करण्यात आली. या प्रकरणी ३१ जुलै २०२६ रोजी रत्नागिरी शहर पोलीस ठाण्यात अज्ञात आरोपीविरुद्ध विविध कलमांनुसार गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना २५ जुलै रोजी सायंकाळी ६:३६ ते ७:३७ या वेळेत घडली. यासंदर्भात कर सल्लागार असलेले राजेश रमेश सोहनी (वय ४०, रा. आश्रय शांतिनगर, नाचणे, ता. जि. रत्नागिरी) यांनी पोलीस ठाण्यात तक्रार दाखल केली आहे. फिर्यादी राजेश सोहनी यांचे मित्र धीरज अर्जुन भानुशाली (रा. शांतिनगर, ता. जि. रत्नागिरी) यांचे बँक ऑफ इंडियाच्या मारुती मंदिर शाखेत बचत खाते आहे.
अज्ञात सायबर भामट्याने धीरज भानुशाली यांच्या बँक खात्यावर डल्ला मारत कोणतीही पूर्वकल्पना न देता ५,८६,००९ रुपयांची रक्कम ऑनलाइन हस्तांतरित (Transfer) करून त्यांची मोठी आर्थिक फसवणूक केली. जेव्हा खात्यातून एवढी मोठी रक्कम वळती झाल्याचे लक्षात आले, तेव्हा त्यांनी तात्काळ पोलिसांत धाव घेतली.
या हायटेक फसवणूक प्रकरणी रत्नागिरी शहर पोलीस ठाण्यात अज्ञात आरोपीविरुद्ध भारतीय न्यायसंहिता (BNS) २०२३ चे कलम ३१८(४), माहिती तंत्रज्ञान (IT) अधिनियम २००० चे कलम ६६ (ड) तसेच जुन्या भारतीय दंड संहितेच्या (IPC) कलम ४२० अन्वये गुन्हा नोंदवण्यात आला आहे. या गुन्ह्याचा पुढील तपास पोलीस यंत्रणेकडून वेगाने केला जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:03 01-08-2026
