फिनोलेक्सच्या अग्निशामक पथकाने मृतदेह बाहेर काढला; पूर्णगड पोलीस ठाण्यात आकस्मिक मृत्यूची नोंद
रत्नागिरी: Ratnagiri Drowning Incident मुळे रनपार आणि परिसर क्षेत्रात तीव्र हळहळ व्यक्त केली जात आहे. रत्नागिरी तालुक्यातील शिरबांडवाडी ओझर येथील पाण्याच्या खोल डोहात बुडून एका ४० वर्षीय तरुणाचा दुर्दैवी मृत्यू झाल्याची घटना गुरुवारी, ३० जुलै रोजी दुपारी ३:३० वाजेच्या सुमारास उघडकीस आली. राजेश दिनकर किर (वय ४०, रा. रनपार किरवठार, ता. जि. रत्नागिरी) असे मृत तरुणाचे नाव आहे. याप्रकरणी पूर्णगड पोलीस ठाण्यात नोंद करण्यात आली आहे.
मिळालेल्या माहितीनुसार, राजेश किर हे शिरबांडवाडी ओझर येथील पाण्याच्या डोहाजवळ गेले असताना ही घटना घडली. दुपारी ३:३० वाजेच्या सुमारास घरातील सदस्य नितीन पुरुषोत्तम किर यांना स्थानिक ग्रामस्थ जयवंत किर यांनी राजेश डोहात बुडाल्याची माहिती दिली. घटनेचे गांभीर्य ओळखून नातेवाईक व ग्रामस्थांनी तात्काळ घटनास्थळी धाव घेतली. त्या वेळी उपस्थित ग्रामस्थ दोरी आणि काठीच्या साहाय्याने राजेश यांना बाहेर काढण्याचा प्रयत्न करत होते. मात्र, डोहातील पाणी अत्यंत खोल असल्याने बचावकार्यात मोठे अडथळे येत होते.
घटनेची माहिती मिळताच फिनोलेक्स कंपनीच्या फायर फायटर विभागाचे अधिकारी अनिल सुर्वे हे आवश्यक साहित्यासह घटनास्थळी दाखल झाले. त्यांनी बोया, दोरी आणि गळाच्या साहाय्याने सायंकाळी ५ वाजेच्या सुमारास राजेश यांचा शोध घेऊन त्यांना डोहातून बाहेर काढले. त्या वेळी राजेश हे बेशुद्ध अवस्थेत होते. उपस्थितांनी त्यांना तात्काळ रुग्णवाहिकेतून रत्नागिरी जिल्हा शासकीय रुग्णालयात उपचारासाठी हलवले, परंतु तेथील वैद्यकीय अधिकाऱ्यांनी तपासणीअंती त्यांना दाखल करण्यापूर्वीच मृत घोषित केले.
या दुर्दैवी घटनेची माहिती मृत तरुणाचे चुलत भाऊ नितीन पुरुषोत्तम किर यांनी पूर्णगड पोलीस ठाण्यात दिली. त्यानुसार पोलिसांनी प्राथमिक आकस्मिक मृत्यूची (ADR) नोंद केली असून, घटनेचा पुढील अधिक तपास पूर्णगड पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:33 01-08-2026
