वालोपे रेल्वे स्टेशन परिसरामध्ये संशयिताला बेड्या; ५३० ग्रॅम गांजा जप्त
रत्नागिरी जिल्ह्यात अंमली पदार्थांचे जाळे समूळ नष्ट करण्यासाठी पोलीस प्रशासनामार्फत ‘मिशन फिनिक्स’ ही विशेष मोहीम राबवली जात आहे. जिल्हा पोलीस अधीक्षक नितीन दत्तात्रय बगाटे आणि अपर पोलीस अधीक्षक बी.बी. महामुनी यांच्या सूचनेनुसार जिल्ह्यातील सर्व पोलीस ठाण्यांना अवैध धंद्यांविरोधात कठोर कारवाईचे आदेश देण्यात आले आहेत. या मोहिमेअंतर्गत चिपळूण पोलीस ठाण्याच्या पथकाने वालोपे रेल्वे स्टेशन परिसरात कारवाई करत ३० हजार रुपये किमतीच्या गांजासह एकाला अटक केली आहे.
वालोपे रेल्वे स्टेशनसमोर संशयास्पद हालचालींवरून पकडले
चिपळूण पोलीस ठाण्याचे पोलीस निरीक्षक फुलचंद मेंगडे यांच्या मार्गदर्शनाखाली गुन्हे प्रकटीकरण पथकाचे अधिकारी व अंमलदार ३१ जुलै २०२६ रोजी हद्दीत गस्त (पेट्रोलिंग) घालत होते. यावेळी वालोपे येथील रेल्वे स्टेशनसमोरील साई मंदिरा शेजारी एक व्यक्ती हातामध्ये कापडी पिशवी घेऊन संशयास्पद हालचाली करताना आढळून आली.
अंगझडतीत सापडला ५३० ग्रॅम गांजा
संशयिताची हालचाल संशयास्पद वाटल्याने पोलिसांनी पंचांसमक्ष त्याला जागीच थांबवून चौकशी केली. चौकशीदरम्यान त्याने आपले नाव अब्दुल गफ्फार हमीद म्हालदार (वय ४८ वर्षे, रा. चिवेली मोहल्ला, ता. चिपळूण, जि. रत्नागिरी) असे सांगितले. पोलिसांनी त्याची पंचांसमक्ष अंगझडती घेतली असता, त्याच्या ताब्यातील पांढऱ्या कापडी पिशवीत असलेल्या प्लास्टिकच्या पिशवीमध्ये ५३० ग्रॅम वजनाचा, ३० हजार रुपये किमतीचा ‘गांजा’ सदृश अंमली पदार्थ मिळून आला.
एन.डी.पी.एस. कायद्यान्वये गुन्हा दाखल
अब्दुल गफ्फार म्हालदार हा गांजा सदृश अंमली पदार्थ बेकायदेशीरपणे विक्रीच्या उद्देशाने बाळगून असल्याचे स्पष्ट झाल्याने त्याला पोलिसांनी तात्काळ ताब्यात घेतले. या प्रकरणी चिपळूण पोलीस ठाण्यात गु.र.नं. २२३/२०२६ एन.डी.पी.एस. (NDPS) ॲक्ट १९८५ चे कलम ८ (क), २० (ब), २ (अ) अन्वये गुन्हा दाखल करण्यात आला असून, पोलीस पुढील तपास करत आहेत.
पोलिसांच्या संयुक्त पथकाची धडक कारवाई
ही यशस्वी कारवाई पोलीस अधीक्षक नितीन दत्तात्रय बगाटे, अपर पोलीस अधीक्षक बी.बी. महामुनी आणि पोलीस निरीक्षक फुलचंद मेंगडे यांच्या नेतृत्वाखालील पथकाने केली. या कारवाईत पोलीस उपनिरीक्षक ओम आघाव, पोलीस हवालदार संदीप माणके (बॅच क्र. ६१७), वृषाल शेटकर (बॅच क्र. ११५१), रोशन पवार (बॅच क्र. १५३३), पोलीस शिपाई शैलेश वनगे (बॅच क्र. ३८५) आणि रुपेश जोगी (बॅच क्र. १३१५) यांनी सक्रिय सहभाग घेतला.
