अंजनारी घाटात अपघातानंतर ट्रकला भीषण आग; पोलीस व अग्निशामक दलाच्या तत्परतेमुळे प्राणहानी टळली
मुंबई-गोवा राष्ट्रीय महामार्गावरील अंजनारी घाटात काजळी नदी पुलाजवळ सायंकाळी ४:३० वाजेच्या सुमारास एक भीषण अपघात घडला. मुंबईहून गोव्याच्या दिशेने केमिकल पावडर घेऊन जाणाऱ्या भरधाव ट्रकचा ताबा सुटून तो दुसऱ्या ट्रकला धडक देऊन दरडीवर आदळला. अपघातानंतर ट्रकने अचानक पेट घेतला आणि महामार्गावर आगीचे मोठे लोट पसरले. सुदैवाने, पोलीस आणि स्थानिकांच्या तत्परतेमुळे चालक आणि क्लीनरला वेळेत बाहेर काढल्याने कोणतीही जीवितहानी झाली नाही.
तीव्र उतारावर ताबा सुटल्याने दुसऱ्या ट्रकला धडक अन् भीषण अपघात
अपघाताबाबत मिळालेल्या अधिक माहितीनुसार, ‘RJ-GD-9798’ क्रमांकाचा ट्रक मुंबईहून केमिकल पावडर घेऊन गोव्याच्या दिशेने जात होता. अंजनारी घाटातील तीव्र उतारावर आल्यावर चालकाचा गाडीवरील ताबा सुटला. त्यामुळे या ट्रकने महामार्गावरून जाणाऱ्या ‘KL-29 T9721’ या दुसऱ्या ट्रकला जोरदार धडक दिली आणि महामार्ग सोडून दुसऱ्या बाजूला जात पुलाजवळील दरडीवर आपटून पलटी झाला.
घटनास्थळी आग आणि वाहतूक कोंडी
दरडीवर आपटताच ट्रकने अचानक भीषण पेट घेतला. बघता बघता संपूर्ण ट्रक आगीच्या भक्षस्थानी पडला. महामार्गावर उठणारे आगीचे लोट आणि धुराचे लोट यामुळे वाहनचालक व स्थानिक नागरिकांमध्ये भीतीचे आणि घबराटीचे वातावरण पसरले. अपघातामुळे महामार्गावरील वाहतूक काही काळ पूर्णपणे खोळंबली होती.
पोलीस व अग्निशामक दलाची धडक कारवाई
अपघाताची माहिती मिळताच लांजा पोलीस आणि हातखंबा वाहतूक पोलीस तात्काळ घटनास्थळी दाखल झाले. उपस्थित पोलीस व नागरिकांनी प्रसंगावधान राखून पेटत्या ट्रकमधून चालक आणि क्लीनरला सुरक्षित बाहेर काढले व उपचारासाठी लांजा ग्रामीण रुग्णालयात दाखल केले. पाठोपाठ रत्नागिरी एमआयडीसीचा अग्निशामक बंब घटनास्थळी पोहोचला आणि आगीवर नियंत्रण मिळवले, मात्र तोपर्यंत ट्रक पूर्णपणे जळून खाक झाला होता. पोलिसांनी तात्काळ वाहतूक नियंत्रणात आणून एकेरी वाहतूक सुरू केली.
अंजनारी घाटातील अपघातांवर ठोस उपाययोजनेची मागणी
अंजनारी घाटातील तीव्र उतारावर वारंवार गंभीर अपघात होत असल्याने स्थानिक जनतेतून तीव्र संताप व्यक्त केला जात आहे. वाहनांच्या वेगावर नियंत्रण ठेवण्यासाठी महामार्ग प्रशासन आणि पोलीस विभागाने तातडीने ठोस उपाययोजना कराव्यात, अशी जोरदार मागणी नागरिकांकडून केली जात आहे. या अपघाताचा पुढील तपास लांजा पोलीस करत आहेत.
