‘मिशन फिनिक्स’ अंतर्गत दुचाकी पार्किंगमध्ये छापा; २१ हजार रुपयांचे अंमली पदार्थ जप्त
रत्नागिरी शहरात अंमली पदार्थांची विक्री आणि तस्करी करणाऱ्यांविरोधात पोलिसांनी धडक मोहीम उघडली आहे. रत्नागिरी रेल्वे स्टेशन परिसरातील दुचाकी पार्किंगमध्ये स्थानिक गुन्हे अन्वेषण शाखेच्या (LCB) पथकाने कारवाई करत ‘ब्राऊन हेरॉईन’ सदृश अंमली पदार्थासह एका संशयिताला रंगेहाथ पकडले आहे. या कारवाईत पोलिसांनी २१ हजार रुपये किमतीच्या ६० पुड्या जप्त केल्या आहेत.
गस्तीदरम्यान दुचाकी पार्किंगमध्ये सापळा
स्थानिक गुन्हे अन्वेषण शाखा, रत्नागिरी येथील पोलीस अंमलदार विवेक श्रीधर रसाळ आणि त्यांचे सहकारी १ ऑगस्ट २०२६ रोजी रत्नागिरी शहर परिसरात गस्त (पेट्रोलिंग) घालत होते. माळनाका-नाचणे रोड-कुवारबाव ते रेल्वे स्टेशन परिसरात गस्त सुरू असताना, रेल्वे स्टेशन येथील दुचाकी पार्किंगमध्ये एक इसम संशयास्पद हालचाली करताना आढळून आला.
अंगझडतीत २ ग्रॅम ब्राऊन हेरॉईन आणि ६० पुड्या जप्त
पोलिसांनी पंचांसमक्ष संशयित इसमाला थांबवून त्याची चौकशी केली. अब्दुल रऊफ इक्बाल डोंगरकर (रा. कर्ला, ता. जि. रत्नागिरी) असे नाव सांगणाऱ्या या आरोपीची अंगझडती घेतली असता, त्याच्याकडे एक पारदर्शक प्लास्टिकची पिशवी मिळून आली. या पिशवीमध्ये विक्रीसाठी आणलेला ‘ब्राऊन हेरॉईन’ सदृश अंमली पदार्थ आढळला. प्लास्टिक पिशवीसह या पदार्थाचे एकूण वजन ४ ग्रॅम (निव्वळ ब्राऊन हेरॉईनचे वजन २ ग्रॅम) असून, प्रत्येकी ३५० रुपये किमतीच्या एकूण ६० पुड्या पोलिसांनी जप्त केल्या आहेत.
एन.डी.पी.एस. कायद्यानुसार गुन्हा दाखल
बेकायदेशीरपणे विक्रीच्या उद्देशाने अंमली पदार्थ बाळगल्याप्रकरणी आरोपी अब्दुल रऊफ डोंगरकर याच्याविरोधात रत्नागिरी शहर पोलीस ठाण्यात एन.डी.पी.एस. (NDPS) ॲक्ट १९८५ चे कलम ८ (क), २१ (अ) अन्वये गु.र.नं. २५६/२०२६ नुसार गुन्हा दाखल करण्यात आला आहे. रत्नागिरी शहर पोलीस या प्रकरणाचा पुढील सखोल तपास करत आहेत.
