घर बंद असल्याचा फायदा घेत ६ लाखांचा ऐवज अन् रोख रक्कम लंपास; दोघांवर गुन्हा दाखल
चिपळूण :
चिपळूण तालुक्यातील कळमुंडी येथील हनुमानवाडी परिसरात एक धक्कादायक घरफोडीची घटना उघडकीस आली आहे. घरातीलच मोलकरीण आणि तिच्या एका साथीदाराने संगनमत करून तब्बल ५ लाख ८८ हजार ६०० रुपयांचे सोन्याचे दागिने आणि रोख रक्कम चोरून नेल्याचा गंभीर प्रकार उघडकीस आला आहे. या प्रकरणी चिपळूण पोलीस ठाण्यात दोघांविरुद्ध गुन्हा दाखल करण्यात आला आहे.
या घटनेबाबत सुयोग संतोष बेलवलकर (वय ३०, व्यवसाय – हॉटेल, रा. कळमुंडी, हनुमानवाडी, ता. चिपळूण) यांनी चिपळूण पोलीस ठाण्यात अधिकृत फिर्याद दिली आहे.
बंद घराचा कडी-कोयंडा तोडून घरात प्रवेश
पोलीस सूत्रांकडून मिळालेल्या माहितीनुसार, ३१ जुलै रोजी सकाळी ५ ते १ ऑगस्ट रोजी सायंकाळी ७:०४ या कालावधीत फिर्यादी बेलवलकर यांचे घर बंद होते. हीच संधी साधून संशयित आरोपींनी मुख्य दरवाजाचा कडी-कोयंडा तोडून घरात बेकायदेशीर प्रवेश केला. त्यानंतर बेडरूममधील कपाटातील सोन्याचे दागिने आणि रोख रक्कम असा एकूण ५ लाख ८८ हजार ६०० रुपयांचा ऐवज चोरून नेला.
मोलकरणीसह साथीदारावर BNS अंतर्गत गुन्हा दाखल
या चोरी प्रकरणात घरातील मोलकरीण सौ. दिपीका दिलीप बोबले (वय ४०, रा. आवेरीवाडी, कळमुंडी, ता. चिपळूण) आणि तिचा साथीदार गणेश काशिराम गोरीवले (वय ३१, रा. कळमुंडी, ता. चिपळूण) या दोघांविरुद्ध भारतीय न्याय संहिता (BNS) कलम ३३१(३), ३३१(४), ३०५(अ) व ३(५) अन्वये गुन्हा क्रमांक २२४/२०२६ दाखल करण्यात आला आहे.
सोन्याच्या दागिन्यांसह रोख रकमेची चोरी
चोरीस गेलेल्या ५,८८,६०० रुपयांच्या ऐवजात खालील मुद्देमालाचा समावेश आहे:
- सोन्याचे दागिने: सोन्याचे मंगळसूत्र, कानातील दागिने, सोन्याची चेन, ब्रेसलेट, पेंडंट, सोन्याच्या अंगठ्या, सोन्याची नाणी, नथ आणि सोन्याचे मणी.
- रोख रक्कम: कपाटात ठेवलेली १८ हजार ६०० रुपयांची रोख रक्कम.
या संपूर्ण घरफोडीच्या गुन्ह्याचा पुढील सखोल तपास चिपळूण पोलीस ठाण्याचे अधिकारी करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:24 03-08-2026
