पुण्यश्लोक अहिल्यादेवी होळकर कर्जमाफी योजनेचा सरसकट सर्वांना लाभ देण्याची मागणी
राज्याचे महसूलमंत्री चंद्रशेखर बावनकुळे हे काल रत्नागिरी दौऱ्यावर आले असताना भारतीय जनता पार्टी दक्षिण रत्नागिरीचे तालुकाध्यक्ष संयोग उर्फ दादा दळी यांनी त्यांची भेट घेतली. या भेटीदरम्यान त्यांनी शेतकरी कर्जमाफीची अंमलबजावणी करताना स्थानिक आंबा उत्पादक व इतर शेतकऱ्यांना येणाऱ्या विविध तांत्रिक अडचणी महसूलमंत्र्यांच्या निदर्शनास आणून दिल्या. तसेच या अडचणी दूर करून सर्व शेतकऱ्यांना दिलासा देणारे एक सविस्तर निवेदनही मंत्री बावनकुळे यांना सादर केले.
७/१२ वरील नावांच्या भिन्नतेमुळे ‘फार्मर आयडी’ बनवण्यात अडथळे
दादा दळी यांनी दिलेल्या निवेदनानुसार, राज्य सरकारने जाहीर केलेल्या ‘पुण्यश्लोक अहिल्यादेवी होळकर शेतकरी कर्जमाफी योजने’बद्दल कोकणातील शेतकऱ्यांनी सरकारचे आभार मानले आहेत. मात्र, या योजनेतील पात्र लाभार्थी यादीमधील काही अपवादात्मक ठिकाणी वित्तीय संस्थांनी करारपत्रावर आंबा पीक कर्ज दिले आहे. सदर कर्जदार लाभार्थी हे घरातील मुलगा, पत्नी अथवा सून अशा व्यक्ती असून त्यांनी करारपत्राच्या आधारे हे कर्ज घेतले आहे. परंतु, संबंधित जमिनीच्या ७/१२ उताऱ्यावर वडील, पती किंवा सासरे यांची नावे असल्याने प्रत्यक्ष कर्जदार व्यक्तीचा ‘फार्मर आयडी’ (Farmer ID) तयार करता आलेला नाही.
‘फार्मर आयडी’अभावी पात्र शेतकरी कर्जमाफीपासून वंचित राहण्याची भीती
आंबा पिकाचे मोठे नुकसान झाल्याने हे कर्जदार शेतकरी सध्या आर्थिक संकटात आहेत. कर्जमाफीच्या पात्र यादीमध्ये त्यांची नावे समाविष्ट असूनही, केवळ ‘फार्मर आयडी’ उपलब्ध नसल्यामुळे संबंधित शेतकऱ्यांना या महत्त्वपूर्ण योजनेच्या लाभापासून वंचित राहावे लागण्याची मोठी शक्यता निर्माण झाली आहे.
२ लाखांपर्यंतची कर्जमाफी सरसकट देण्याची महसूलमंत्र्यांकडे विनंती
या गंभीर समस्येकडे राज्य सरकारने विशेष लक्ष देऊन धोरणात्मक निर्णय घ्यावा, अशी जोरदार मागणी निवेदनाद्वारे करण्यात आली आहे. नियमांमध्ये आवश्यक ती सुधारणा करून २ लाख रुपयांपर्यंत असणारी शेतकरी कर्जमाफी सरसकट सर्व पात्र व गरजू शेतकऱ्यांना मिळावी आणि त्यांना या योजनेचा पूर्ण लाभ व्हावा, अशी नम्र विनंती दादा दळी यांनी महसूलमंत्री चंद्रशेखर बावनकुळे यांच्याकडे केली आहे.
