भारतीय नागरिक सुरक्षा संहितेनुसार पोलिसांचा पुढील तपास सुरू
Ratnagiri News: रत्नागिरी शहरातील मिरकरवाडा जेटी परिसरामध्ये गुरुवारी, १ ऑगस्ट रोजी सकाळी साडेनऊच्या सुमारास समुद्राच्या पाण्यात बुडून सहास रघुनाथ मांडवकर (वय ४३) या व्यक्तीचा मृत्यू झाल्याची दुर्दैवी घटना घडली आहे. मृत व्यक्ती मुरुगवाडा येथे वास्तव्यास होती. या प्रकरणी रत्नागिरी शहर पोलिसांनी तातडीने दखल घेत आकस्मिक मृत्यूची नोंद केली असून, या घटनेमागील नेमक्या कारणांचा शोध घेण्यास सुरुवात केली आहे.
पोलीस सूत्रांनी दिलेल्या माहितीनुसार, १ ऑगस्टच्या सकाळी मिरकरवाडा जेटी येथील समुद्राच्या पाण्यात एक अज्ञात मृतदेह मिळून आला होता. या घटनेची माहिती खबर देणारे दीपक रघुनाथ मांडवकर यांचा मित्र राज बिर्जे याला मिळाली. मृताचा चेहरा सहास मांडवकर यांच्याशी मिळताजुळता असल्याने बिर्जे यांनी तातडीने दीपक यांना दूरध्वनीवरून संपर्क साधला. माहिती मिळताच दीपक मांडवकर यांनी घटनास्थळी धाव घेतली आणि पाण्यात मिळालेला मृतदेह आपला सख्खा भाऊ सहास याचाच असल्याची खात्री केली.
ओळख पटल्यानंतर नातेवाईक आणि स्थानिकांच्या मदतीने सहास याला रुग्णवाहिकेतून तातडीने रत्नागिरी येथील जिल्हा शासकीय रुग्णालयात उपचारासाठी हलवण्यात आले. मात्र, रुग्णालयातील कर्तव्यावर असलेल्या वैद्यकीय अधिकाऱ्यांनी त्याची कसून तपासणी केली असता, उपचारापूर्वीच त्याचे निधन झाल्याचे स्पष्ट करत त्याला मृत घोषित केले.
मृत सहास मांडवकर हा मूळचा मुरुगवाडा येथील रहिवासी असून तो सचिन पिलणकर यांच्या घरी भाड्याने राहत होता. त्याला गेल्या अनेक वर्षांपासून मद्यपानाचे व्यसन असल्याची प्राथमिक माहिती पोलिसांच्या तपासात समोर आली आहे. या प्रकरणी रत्नागिरी शहर पोलीस ठाण्यात भारतीय नागरिक सुरक्षा संहिता (BNSS) २०२३ च्या कलम १९४ नुसार आकस्मिक मृत्यूची (एडीआर) अधिकृत नोंद करण्यात आली आहे. पोलीस आता या मृत्यूची सखोल चौकशी करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:09 03-08-2026
