आमदार शेखर निकम यांच्या कार्यपद्धतीचे कौतुक; सावर्डे येथील सह्याद्री शिक्षण संस्थेला महसूलमंत्र्यांची सदिच्छा भेट
Pedhe Kolkewadi Issues Resolution Bawankule संदर्भात चिपळूण तालुक्यातून एक महत्त्वपूर्ण बातमी समोर येत आहे. चिपळूण-संगमेश्वर विधानसभा मतदारसंघातील पेढे आणि नवीन कोळकेवाडी येथील प्रलंबित महसूल व इतर सर्व प्रश्न शासन स्तरावर तातडीने व सकारात्मकतेने मार्गी लावले जातील, असे ठोस आश्वासन राज्याचे महसूलमंत्री चंद्रशेखर बावनकुळे यांनी दिले आहे. सावर्डे येथील सह्याद्री शिक्षण संस्था तसेच स्थानिक आमदार शेखर निकम यांच्या जनसंपर्क कार्यालयाला भेट दिली असता ते बोलत होते.
याप्रसंगी बोलताना महसूलमंत्री बावनकुळे यांनी आमदार शेखर निकम यांच्या विकासाभिमुख कार्यपद्धतीचे जाहीरपणे कौतुक केले. “शेखर निकम यांचे काम अत्यंत उत्तम आणि कौतुकास्पद आहे. मी त्यांच्या पाठीशी खंबीरपणे उभा आहे. त्यांनी मांडलेले सर्व रास्त प्रश्न शासनाकडून प्राधान्याने सोडवले जातील,” असे सांगत महसूलमंत्र्यांनी आमदार निकम यांच्यावर पूर्ण विश्वास व्यक्त करत त्यांना शाबासकी दिली. चिपळूण-संगमेश्वर परिसरातील महसूल संदर्भातील एकही काम शासन स्तरावर प्रलंबित राहणार नाही, अशी ग्वाहीही त्यांनी दिली.
आपल्या दौऱ्यादरम्यान मंत्री बावनकुळे यांनी महायुतीच्या मजबुतीवर भर दिला. “सर्व घटकांना विश्वासात घेऊन विकासाचा रथ पुढे नेणारे लोकप्रतिनिधी म्हणजे आमदार शेखर निकम आहेत. महायुतीचे काम अधिक ताकदीने आणि समन्वयाने करा, राज्य शासन तुमच्या पाठीशी भक्कमपणे उभे आहे,” असा विश्वास त्यांनी कार्यकर्त्यांना दिला.
या सदिच्छा भेटीदरम्यान आमदार प्रमोद जठार, आमदार विक्रांत पाटील, जिल्हाध्यक्ष प्रशांत यादव या प्रमुख नेत्यांसह स्थानिक पदाधिकारी उपस्थित होते. भेटीदरम्यान महसूलमंत्र्यांनी सह्याद्री शिक्षण संस्थेच्या कृषी महाविद्यालय, फूड टेक्नॉलॉजी तसेच विविध व्यावसायिक अभ्यासक्रमांची माहिती जाणून घेतली. यावेळी आमदार शेखर निकम यांनी मंत्री बावनकुळे यांचे स्वागत केले. तर संस्थेचे कार्याध्यक्ष अनिरुद्ध निकम, जिल्हा परिषद सदस्या पूजा निकम यांच्यासह विविध क्षेत्रातील मान्यवर मोठ्या संख्येने उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:44 04-08-2026
