राजापूर तालुक्यातील पाडेकरवाडी येथील घटना; शासकीय रुग्णालयात उपचारादरम्यान मृत्यू
राजापूर : Rajapur Death Case प्रकरणी राजापूर तालुक्यातील कोळंब, पाडेकरवाडी येथील एका ४० वर्षीय तरुणाचा रत्नागिरी येथील शासकीय रुग्णालयात उपचारादरम्यान मृत्यू झाल्याची घटना घडली आहे. ही दुर्दैवी घटना ६ ऑगस्ट रोजी पहाटेच्या सुमारास उघडकीस आली. या घटनेमुळे राजापूर तालुक्यात हळहळ व्यक्त केली जात असून राजापूर पोलीस ठाण्यात आकस्मात मृत्यूची नोंद करण्यात आली आहे.
अचानक प्रकृती बिघडून नाकातून आले होते रक्त
मिळालेल्या माहितीनुसार, दिलीप यशवंत पाडेकर (वय ४०, रा. कोळंब, पाडेकरवाडी, ता. राजापूर) हे ५ ऑगस्ट रोजी दुपारी १ वाजण्याच्या सुमारास घरी असताना त्यांची अचानक प्रकृती बिघडली व त्यांना फिट आली होती. त्यानंतर सायंकाळी ७ वाजता पुन्हा प्रकृती खालावल्याने त्यांच्या नाकातून रक्त येत असल्याचे कुटुंबीयांच्या निदर्शनास आले. त्यामुळे पत्नी व नातेवाईकांनी त्यांना तातडीने रात्री ८ वाजता खासगी वाहनाने राजापूर ग्रामीण रुग्णालयात उपचारासाठी दाखल केले.
१०८ रुग्णवाहिकेने रत्नागिरी हलवले, तरीही प्राण वाचवण्यात अपयश
राजापूर ग्रामीण रुग्णालयात प्राथमिक उपचार केल्यानंतर रुग्णाची गंभीर स्थिती पाहता त्यांना १०८ रुग्णवाहिकेने रत्नागिरीतील शासकीय रुग्णालयात (जिल्हा रुग्णालय) हलवण्यात आले. मात्र, तेथे उपचार सुरू असतानाच वैद्यकीय अधिकाऱ्यांनी तपासणीअंती त्यांना मृत घोषित केले.
राजापूर पोलिसांत आकस्मात मृत्यूची नोंद
या संपूर्ण प्रकरणाबाबत १२ ऑगस्ट रोजी रात्री ११.१७ वाजता राजापूर पोलीस ठाण्यात आकस्मात मृत्यूची (Accidental Death) नोंद करण्यात आली आहे. तरुणाच्या मृत्यूचे नेमके कारण काय होते, हे वैद्यकीय तपासणी व विच्छेदन अहवालानंतरच स्पष्ट होणार असून राजापूर पोलीस या प्रकरणाचा पुढील अधिक तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:18 14-08-2026
