गणेशोत्सवाच्या पार्श्वभूमीवर रखडलेले काम तातडीने पूर्ण करण्याचे स्थानिक प्रशासनाला आदेश; खचलेला रस्ता आणि कोसळलेल्या भिंतीची समस्या मार्गी लागणार
रत्नागिरी: रत्नागिरी शहरातील प्रभाग क्रमांक २ मधील फगरवठार येथे मुसळधार पावसामुळे कोसळलेल्या संरक्षण भिंतीसाठी आणि खचलेल्या रस्त्याच्या दुरुस्तीसाठी पालकमंत्री उदय सामंत यांनी जिल्हा नियोजन समितीतून ३५ लाख रुपयांचा निधी मंजूर केला आहे. आगामी गणेशोत्सवाच्या तोंडावर नागरिकांची गैरसोय टाळण्यासाठी हे काम तातडीने पूर्ण करण्याच्या सूचना स्थानिक नगरसेवक निमेष नायर यांनी दिल्या आहेत.
खोदाईमुळे पायाला धोका; पावसात भिंत कोसळली
फगरवठार परिसरात एका जागा मालकाकडून सपाटीकरणासाठी करण्यात आलेल्या खोदाईमुळे जुन्या संरक्षण भिंतीच्या पायाला मोठा धोका निर्माण झाला होता. त्यानंतर पडलेल्या मुसळधार पावसात ही भिंत पूर्णपणे कोसळली. कोसळलेल्या भिंतीचे काम सध्या संबंधित जागा मालकाकडूनच करून घेतले जात आहे.
मात्र, हे काम सुरू असतानाच भिंत नसलेल्या दुसऱ्या भागात रस्ता खचल्याची नवीन समस्या निर्माण झाली. या ठिकाणी नव्या संरक्षण भिंतीची उभारणी करण्यासाठी पालकमंत्र्यांनी तातडीने निधी उपलब्ध करून दिला.
प्रत्यक्ष पाहणी आणि कामातील अडथळे
यापूर्वी पालकमंत्री उदय सामंत यांनी या परिसराची प्रत्यक्ष पाहणी करून दुरुस्तीची कामे युद्धपातळीवर करण्याच्या सूचना दिल्या होत्या. मात्र, गेल्या तीन दिवसांपासून काही तांत्रिक व स्थानिक कारणांमुळे या संरक्षण भिंतीचे काम बंद पडले होते.
गणेशोत्सव अवघ्या काही दिवसांवर आला असल्याने नगरसेवक निमेष नायर यांनी तातडीने हस्तक्षेप करत संबंधित जागा मालकाची भेट घेतली आणि बंद पडलेले काम पुन्हा सुरू करून ते लवकरात लवकर पूर्ण करण्याचे निर्देश दिले.
गणेशोत्सवापूर्वी काम पूर्ण करण्याची मागणी
फगरवठार परिसरात अनेक कुटुंबे वास्तव्यास असून त्यांच्या घरी दरवर्षी मोठ्या उत्साहात गणरायाचे आगमन होते. रस्ता खचल्यामुळे व भिंत कोसळल्यामुळे या भागात वाहतुकीस आणि पादचाऱ्यांना मोठा धोका निर्माण झाला आहे. त्यामुळे गणेशोत्सवापूर्वी ही नवीन संरक्षण भिंत आणि खचलेल्या रस्त्याचे काम पूर्ण करून परिसर सुरक्षित करावा, अशी आग्रही मागणी स्थानिक रहिवाशांकडून केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:42 22-08-2026
