रिपब्लिकन सोशलिस्ट पक्षाचा पुणे पत्रकार भवनात इशारा; खटला ‘फास्ट ट्रॅक’ कोर्टात चालवण्याची जोरदार मागणी
पुणे :
पुणे जिल्ह्यातील प्रसिद्ध लोहगड किल्ल्यावर घडलेल्या केतन अगरवाल हत्या प्रकरणातील मुख्य आरोपी सिया गोयल हिला तुरुंगात ‘व्हीआयपी ट्रीटमेंट’ (VIP Treatment) दिली जात असल्याचा गंभीर संशय रिपब्लिकन सोशलिस्ट पक्षाने व्यक्त केला आहे. या संपूर्ण प्रकरणाची पारदर्शक चौकशी व्हावी, पोलिसांनी वेळेत तपास पूर्ण करून न्यायालयात भक्कम दोषारोपपत्र दाखल करावे आणि हा खटला ‘फास्ट ट्रॅक कोर्टात’ चालवावा, अशी आक्रमक मागणी पक्षाच्या वतीने करण्यात आली आहे.
बुधवारी पुण्यातील पत्रकार भवनात आयोजित पत्रकार परिषदेत पक्षाच्या पदाधिकाऱ्यांनी पोलीस प्रशासन आणि जेल प्रशासनाच्या भूमिकेवर तीव्र सवाल उपस्थित केले.
जेल अधिकाऱ्यांवर निलंबनाची कारवाई करा; पक्षाची मागणी
पैशांच्या आणि प्रभावाच्या बळावर आरोपींना जेलमध्ये विशेष सवलती मिळणे अत्यंत गंभीर असून, यामुळे संपूर्ण तपास प्रक्रियेवर संशयाची सुई निर्माण होत असल्याचे पक्षाने म्हटले आहे.
- उच्चस्तरीय चौकशी: आरोपी सिया गोयल हिला तुरुंगात मिळणाऱ्या सुविधांची तातडीने चौकशी करण्यात यावी.
- अधिकाऱ्यांवर कारवाई: या प्रकरणात दोषी आढळणाऱ्या जेल अधिकाऱ्यांवर तात्काळ निलंबनाची कारवाई व्हावी.
- कठोर शिक्षेचा निर्धार: जोपर्यंत केतन अगरवालच्या मारेकऱ्यांना फाशी किंवा जन्मठेपेची शिक्षा होत नाही, तोपर्यंत हा लढा सुरूच राहील, असा ठाम निर्धार व्यक्त करण्यात आला.
या पत्रकार परिषदेला रिपब्लिकन सोशलिस्ट पक्षाचे राहुल डंबाळे, अपर्णा दुबे, अॅड. जावेद जमादार, रुद्राणी जावळकर, कैलास देवकर, उषा आवळे आणि राहुल नागटिळक उपस्थित होते.
केतन अगरवाल हत्येचा कसा उलगडला कट? (घटनाक्रम)
लोहगडावर केतन अगरवालचा पाय घसरून दरीत पडल्यामुळे मृत्यू झाल्याचा प्राथमिक बनाव रचण्यात आला होता. मात्र, पोलिसांच्या सतर्कतेमुळे आणि कुटुंबाच्या संशयावरून या हत्येचा रहस्यमय उलगडा झाला:
- १८ जून: केतन दरीत पडल्याचा बनाव. मृतदेह बाहेर काढताना ‘शिवदुर्ग रेस्क्यू टीम’कडे पोलिसांनी शंका उपस्थित केली.
- २१ जून: धार्मिक विधी पूर्ण झाल्यानंतर कुटुंबीयांनी लोहगड गाठून अपघात नसल्याचा पोलिसांकडे दावा केला.
- बहिणीचे प्रश्न अन् सिया निरुत्तर: सांत्वनासाठी आलेल्या सियावर केतनची बहीण संजनाने प्रश्नांची सरबत्ती केली (फोटो कुठे काढले, पाय कसा घसरला इत्यादी). या प्रश्नांमुळे सियाचा संशय वाढला.
- CDR मधून धक्कादायक माहिती: तपासात चेतन चौधरीचे नाव समोर आले. सिया आणि चेतन यांच्यात एका वर्षात २,००४ वेळा फोन कॉल आणि ३०० हून अधिक तास संवाद झाल्याचे उघड झाले.
- CCTV फुटेज आणि मास्कधारी तरुण: लोहगडावरील सीसीटीव्हीत भर उन्हात हुडी, हेडफोन आणि मास्क घातलेला तरुण सियाला खुणावताना दिसला.
- फोन लोकेशनचा चकवा: चेतनचे फोन लोकेशन मार्केटयार्ड दाखवत होते, मात्र पोलिसांनी शोध घेतला असता त्याने स्वतःचा फोन दुकानातील कामगाराकडे ठेवून, कामगाराचा फोन सोबत घेऊन लोहगड गाठल्याचे निष्पन्न झाले.
- २२ जून: पुणे ग्रामीण पोलिसांच्या स्थानिक गुन्हे शाखेने संशयिताला ताब्यात घेऊन पोलिसी खाक्या दाखवताच आरोपी सिया गोयल हिचे भांडे फुटले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:23 27-08-2026
