अपुऱ्या कामांवरून केंद्रीय मंत्री नितीन गडकरी आणि स्थानिक पालकमंत्र्यांवर साधला निशाणा; पेपरफुटीच्या मुद्द्यावरूनही सरकारला घेरले
मुंबई-गोवा महामार्गाच्या रखडलेल्या कामावरून आणि निकृष्ट दर्जाच्या बांधकामावरून ठाकरेंच्या शिवसेनेचे आमदार आदित्य ठाकरे यांनी सरकारवर तीव्र शब्दांत टीका केली आहे. मुंबई-गोवा महामार्गाची थेट घटनास्थळी जाऊन पाहणी केल्यानंतर आयोजित पत्रकार परिषदेत बोलताना त्यांनी केंद्रीय रस्ते वाहतूक व महामार्ग मंत्री नितीन गडकरी यांच्यासह राज्य सरकारच्या कारभारावर गंभीर प्रश्न उपस्थित केले.
महामार्गावरील पुलांची आणि बोगद्यांची झालेली दुरवस्था दाखवून देताना आदित्य ठाकरे म्हणाले की, “स्पेस टेक्नॉलॉजीचा वापर करून बांधल्याचा दावा केला गेलेला पूल अवघ्या काही दिवसांतच वाहतुकीसाठी बंद करावा लागला आहे. नॅशनल हायवेच्या अधिकाऱ्यांनी ऑडिट केल्यानंतर हा पूल बंद करण्याची वेळ आली.” महामार्गावरील अंडरपास आणि टनेलमध्ये गुडघाभर पाणी साचले असून तिथली स्थिती अत्यंत बिकट झाली आहे, असा आरोप त्यांनी केला. गेली दहा वर्षे दरवर्षी ‘गणपतीच्या आधी रस्ता पूर्ण होणार’ अशी आश्वासने दिली जातात, परंतु प्रत्यक्ष पाहाणी केल्यास रस्ता अद्याप अपूर्णच आहे. जर वारंवार कंत्राटदार काम सोडून पळून जात असतील, तर संबंधित खात्याचा आणि मंत्रिपदाचा काय उपयोग, असा थेट सवाल त्यांनी उपस्थित केला.
यावेळी त्यांनी स्थानिक राजकारणावर आणि पालकमंत्र्यांच्या कारभारावरही टोलेबाजी केली. “पालकमंत्र्यांचे महामार्गावर लावलेले बॅनर उत्तम ‘A1’ दर्जाचे आहेत, मात्र पुलांचे बांधकाम अत्यंत निकृष्ट दर्जाचे आहे. दोन वर्षांपासून पालकमंत्री पद, गाड्या आणि बंगल्यांसाठी भांडणारे मंत्री रस्त्यांच्या दुरवस्थेवर मात्र मौन बाळगून आहेत, कारण हे सर्व कॉन्ट्रॅक्टरचे हितसंबंध जपणारे भांडण आहे,” असा घणाघात त्यांनी केला.
रस्त्यांच्या मुद्द्यासोबतच त्यांनी राज्य आणि देशातील परीक्षांमधील गोंधळावरूनही सरकारवर निशाणा साधला. ‘नीट’ (NEET), ‘सीईटी’ (CET) आणि ‘एमपीएससी’ (MPSC) पेपरफुटीच्या घटनांचा उल्लेख करत त्यांनी सांगितले की, महाराष्ट्रातील तरुण मुले-मुली जेव्हा आपल्या हक्कासाठी रस्त्यावर उतरतात, तेव्हा हे सरकार त्यांच्यावर लाठीचार्ज करते. ज्या सरकारला एक परीक्षा सुव्यवस्थित आणि पारदर्शकपणे घेता येत नाही, ते ‘वन नेशन, वन इलेक्शन’च्या गप्पा मारत आहे, अशी टीका त्यांनी शेवटी केली.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:19 26-08-2026
