“माझ्यामुळे आणि गोगावलेंमुळे आदित्य ठाकरेंना घरातून बाहेर पडावे लागले”; रत्नागिरीतील पत्रकार परिषदेत घेतला खरपूस समाचार
रत्नागिरी : शिवसेना (उद्धव बाळासाहेब ठाकरे) नेते आदित्य ठाकरे यांचा रायगड आणि रत्नागिरी दौरा म्हणजे केवळ भरत गोगावले आणि माझ्यावर वैयक्तिक टीका करण्याचा एकमेव अजेंडा होता, असा घणाघाती आरोप उद्योग व मराठी भाषा मंत्री तथा रत्नागिरी जिल्ह्याचे पालकमंत्री ना. उदय सामंत यांनी केला आहे. रत्नागिरी जिल्हाधिकारी कार्यालयात आयोजित पत्रकार परिषदेत बोलताना त्यांनी आदित्य ठाकरेंच्या वक्तव्यांचा जोरदार समाचार घेतला.
आधी स्वतःच्या मतदारसंघातील प्रश्न सोडवा: ना. उदय सामंत
पत्रकार परिषदेत बोलताना मंत्री उदय सामंत यांनी आदित्य ठाकरेंना थेट आव्हान दिले:
- वरळीतील समस्यांवर बोट: आदित्य ठाकरेंनी कोकणात येऊन राजकारण करण्यापेक्षा आधी स्वतःच्या वरळी मतदारसंघातील प्रलंबित प्रश्नांकडे लक्ष द्यावे. तेथील चाळींचे रखडलेले प्रश्न, वरळी कोळीवाड्यातील शौचालयांची दुरवस्था आणि अल्पसंख्याक समाजाच्या समस्या सोडवून वरळीला महाराष्ट्रासमोर एक आदर्श मतदारसंघ बनवून दाखवावे.
- २०२९ च्या निवडणुकीची आठवण: “२०२९ च्या विधानसभा निवडणुकीत त्यांना पुन्हा तिथूनच जनतेसमोर जायचे आहे आणि निवडून यायचे आहे, हे त्यांनी विसरू नये,” असा सज्जड दमही सामंत यांनी दिला.
- उपरोधिक टोला: “माझ्यामुळे आणि भरतशेठ गोगावले यांच्यामुळे आदित्य ठाकरे कमीत कमी घरातून बाहेर तरी पडायला लागले, याचे मला मनापासून मोठे समाधान आहे,” असा खोचक टोलाही त्यांनी लगावला.
ओबीसी आरक्षणाला धक्का न लावता जरांगेंच्या मागण्यांवर तोडगा
मराठा आरक्षण आंदोलक मनोज जरांगे पाटील यांच्या आंदोलनाबाबत विचारलेल्या प्रश्नावर भूमिका स्पष्ट करताना सामंत म्हणाले की, राज्य शासन या विषयात अत्यंत संवेदनशील आणि सकारात्मक आहे. ओबीसी समाजाच्या अस्तित्वात असलेल्या आरक्षणाला कोणताही धक्का न लावता, कायद्याच्या चौकटीत बसवून मराठा समाजाच्या व जरांगे यांच्या मागण्यांवर योग्य तोडगा काढण्यासाठी शासन कटिबद्ध आहे.
