हर्णे बंदरावर सुरुवातीच्या लिलावात मच्छीमारांना दिलासा
दापोली :
Harni Bandar Fishing हंगामाला १५ ऑगस्टपासून अधिकृतपणे सुरुवात झाली असून दापोली तालुक्यातील ऐतिहासिक हर्णे बंदरात मच्छीमारांची लगबग पुन्हा एकदा वाढली आहे. नारळी पौर्णिमेनंतर अरबी समुद्रात मच्छीमारांची वर्दळ वाढली असून आतापर्यंत सुमारे २५० नौका मासळीच्या शोधात समुद्रात उतरल्या आहेत. पहाटेच्या अंधुक प्रकाशात किनाऱ्यावरून रवाना होणाऱ्या नौका आणि बंदरात मासळीच्या लिलावासाठी जमणारी खरेदी-विक्रीची धावपळ यामुळे हर्णे बंदर पूर्णपणे गजबजून गेले आहे.
लिलावात कोळंबी आणि बांगड्यांचे प्रमाण समाधानकारक
समुद्रातून किनाऱ्यावर परतलेल्या पहिल्याच आवकेतील काही नौकांमधील मासळीचा हर्णे बंदरात प्रत्यक्ष लिलाव करण्यात आला. या लिलावामध्ये विविध प्रकारची कोळंबी तसेच बांगड्यांची मुख्यत्वे आवक झाली आहे. हंगामाच्या सुरुवातीच्याच टप्प्यात कोळंबीचे प्रमाण समाधानकारक राहिल्यामुळे मच्छीमारांमध्ये उत्साहाचे वातावरण पाहायला मिळत आहे.
लहान-मोठ्या नौकांची समुद्राकडे वाटचाल
हंगामाच्या प्रारंभी मोठ्या नौकांसोबतच १५ ते २० फायबरच्या छोट्या बोटीही समुद्रात मासेमारीसाठी उतरल्या आहेत. मच्छीमार आपल्या नियोजनानुसार काही नौका पहाटेच्या वेळी तर काही नौका संध्याकाळच्या सुमारास मासळीच्या शोधात समुद्राकडे रवाना करत आहेत. पहिल्याच आवकेत मिळालेल्या चांगल्या साठ्यामुळे मच्छीमारांच्या आशा पल्लवित झाल्या आहेत.
वेगवान वाऱ्यांमुळे मासेमारीवर काही प्रमाणात परिणाम
नारळी पौर्णिमेनंतर मासेमारी व्यवहारांना वेग आला असला तरी समुद्रातील वेगवान वाऱ्यांचा फटका काही नौकांच्या मासेमारीला बसला आहे. वाऱ्याच्या वेगामुळे समुद्रातील परिस्थिती काही प्रमाणात आव्हानात्मक बनली असून काही नौकांच्या उत्पन्नावर याचा थेट परिणाम दिसून आला आहे. प्रतिकूल हवामानावर मात करत मच्छीमार पुढील दिवसांत चांगल्या आवकेची अपेक्षा व्यक्त करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:00 29-08-2026
