युनायटेड फोरम ऑफ बँक युनियन्सतर्फे बँक ऑफ इंडियाच्या झोनल ऑफिससमोर जोरदार निदर्शने; मागण्या मान्य न झाल्यास आंदोलनाचा इशारा
Bank Employees Protest in Ratnagiri अंतर्गत युनायटेड फोरम ऑफ बँक युनियन्स (UFBU), रत्नागिरीच्या वतीने ५ दिवसांचे बँकिंग तातडीने लागू करावे आणि केंद्र सरकारची भेदभावपूर्ण PLI (Performance Linked Incentive) योजना स्थगित करून मागे घ्यावी, या प्रमुख मागण्यांसाठी शिवाजीनगर येथील बँक ऑफ इंडियाच्या झोनल ऑफिससमोर विविध बँकांतील कर्मचारी व अधिकाऱ्यांनी जोरदार निदर्शने केली. प्रलंबित मागण्यांच्या तातडीने पूर्ततेसाठी बँक कर्मचाऱ्यांनी ही आक्रमक भूमिका घेतली आहे.
Bank Employees Protest in Ratnagiri: ५ दिवसांच्या बँकिंगचा प्रस्ताव केंद्र सरकारकडे प्रलंबित
८ मार्च २०२४ रोजी पार पडलेल्या १२ व्या द्विपक्षीय वेतन करारातील ९ व्या जॉइंट नोटमध्ये इंडियन बँक्स असोसिएशनने (IBA) पाच दिवसांचे बँकिंग लागू करण्यास सहमती दर्शवली होती. त्याबाबतचा प्रस्ताव केंद्र सरकारकडे पाठवण्यात आला होता, परंतु दोन वर्षांहून अधिक काळ लोटला तरी हा प्रस्ताव प्रलंबित आहे. यामुळे बँक कर्मचाऱ्यांमध्ये तीव्र असंतोष निर्माण झाला असून ५ दिवसांचा आठवडा तातडीने मंजूर करण्याची मागणी आंदोलकांनी केली आहे.
PLI योजनेतील असमानतेवर कर्मचाऱ्यांचा तीव्र विरोध
बँकांच्या कामगिरीवर आधारित PLI देण्याबाबत IBA आणि युनियन यांच्यात एकमत झाले होते. मात्र, केंद्र सरकारच्या अर्थ मंत्रालयाच्या नवीन निर्देशानुसार स्केल IV ते VII मधील उच्च अधिकाऱ्यांना वैयक्तिक कामगिरीच्या आधारे ३६५ दिवसांपर्यंतचा पगार PLI म्हणून मिळू शकतो, तर पार्टटाइम कर्मचाऱ्यांपासून स्केल III पर्यंतच्या उर्वरित कर्मचाऱ्यांना केवळ १५ दिवसांचा पगार देण्याची तरतूद करण्यात आली आहे. देशातील सुमारे ८ लाख बँक कर्मचाऱ्यांपैकी ९५ टक्के कर्मचाऱ्यांना बाजूला सारून केवळ ५ टक्के अधिकाऱ्यांचा फायदा करून देणारे हे धोरण अत्यंत भेदभावपूर्ण आणि बँकांवर आर्थिक भार टाकणारे असल्याचा आरोप युनियनने केला आहे.
महिला कर्मचाऱ्यांचा मोठा सहभाग आणि पुढील दिशा
या निदर्शनांमध्ये विविध बँकांमधील महिला कर्मचारी आणि अधिकाऱ्यांचा उत्स्फूर्त व लक्षवेधी सहभाग पाहायला मिळाला. विविध बँक कर्मचारी संघटनांनी एकत्र येऊन या आंदोलनाचे यशस्वी नियोजन केले. प्रलंबित मागण्या तातडीने मान्य न झाल्यास येत्या काळात आंदोलन अधिक तीव्र करण्याचा इशारा UFBU कडून देण्यात आला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:12 29-08-2026
