डिजिटल अरेस्ट, ट्रेडिंग आणि केवायसीच्या बहाण्याने नागरिकांना गंडा; सायबर पोलिसांचे सतर्कतेचे आवाहन
Ratnagiri Cyber Crime Cases अंतर्गत जिल्ह्यात वाढत्या सायबर गुन्ह्यांमुळे नागरिक त्रस्त झाले असून, भामट्यांनी विविध क्लृप्त्या वापरून नागरिकांच्या बँक खात्यांतील रकमांवर डल्ला मारला आहे. ऑगस्ट महिन्यात आतापर्यंत दाखल झालेल्या ५ सायबर गुन्ह्यांमध्ये तब्बल १ कोटी २१ लाख ७६ हजार रुपयांची ऑनलाईन फसवणूक झाल्याचे उघडकीस आले आहे. डिजिटल अरेस्टची भीती दाखवणे, टास्क किंवा ट्रेडिंगद्वारे नफ्याचे आमिष दाखवणे आणि बनावट ॲप्स डाउनलोड करायला लावणे यांसारख्या मार्गांचा वापर करून सायबर भामटे सक्रिय झाले आहेत.
Ratnagiri Cyber Crime Cases: वयोवृद्ध नागरिक भामट्यांचे मुख्य लक्ष्य
मोबाईलचा वापर आणि तांत्रिक ज्ञान कमी असल्याचा गैरफायदा घेत सायबर गुन्हेगार प्रामुख्याने वयोवृद्ध नागरिकांना आपले सावज बनवत आहेत. ऑगस्ट महिन्यात फसवणूक झालेल्या ६ बाधितांमध्ये चार वयोवृद्ध नागरिकांचा समावेश आहे. फसवणुकीच्या या घटनांमध्ये रत्नागिरी शहरातील चार, चिपळूणमधील एक आणि मंडणगड तालुक्यातील एका घटनेचा समावेश आहे. यामध्ये तीन पुरुष आणि दोन महिला सायबर गुन्हेगारांच्या जाळ्यात अडकल्याचे समोर आले आहे.
ऑगस्ट महिन्यात घडलेल्या प्रमुख ऑनलाईन फसवणुकीच्या घटना
जिल्ह्यात वेगवेगळ्या पद्धतीने नागरिकांची आर्थिक लुटालूट करण्यात आली आहे:
- महानगर गॅस एजन्सीच्या नावाखाली: ‘गॅस सप्लाय बंद होणार आहे’ असे सांगून एका शिक्षकाच्या खात्यातून ६,४८,६५२ रुपये लांबवले.
- एसबीआय युनो ॲपचा बहाणा: ॲप ऑफिसमधून बोलत असल्याचे भासवून एका ज्येष्ठ नागरिकाची ५,२६,२७९ रुपयांची फसवणूक केली.
- कॅन्डो ॲप डाउनलोड: स्वातंत्र्य दिनाच्या शुभेच्छा देण्यासाठी ॲप डाउनलोड करायला लावून एका वृद्धाच्या खात्यातून ८,६२,४०० रुपये गायब केले.
- ट्रेडिंग आणि जास्त नफ्याचे आमिष: कमी वेळेत जास्त परतावा देण्याचे आमिष दाखवून एका दांपत्याला ९१,३७,०५४ रुपयांचा गंडा घातला.
- डिजिटल अरेस्टची भीती: ‘मिनिस्ट्री ऑफ इंडिया’मधून बोलत असल्याचे सांगून दहशतवादाशी संबंध असल्याच्या खोट्या आरोपाखाली अटकेची भीती दाखवत वयोवृद्ध महिलेकडून ८,४९,५४३ रुपये उकळले.
- केवायसीचा बहाणा (मंडणगड): मंडणगड तालुक्यात केवायसी अपडेट करण्याच्या बहाण्याने २ लाख ७६ हजार रुपयांची ऑनलाईन फसवणूक झाली असून, या प्रकरणी मंडणगड पोलीस ठाण्यात अज्ञात आरोपीविरुद्ध गुन्हा दाखल झाला आहे.
फसवणूक टाळण्यासाठी सायबर पोलिसांचे आवाहन व उपाययोजना
अनोळखी क्रमांक, संदेश किंवा सोशल मीडियावरून आलेल्या संशयास्पद लिंकवर कधीही क्लिक करू नका. अशा लिंकमुळे मोबाईलमध्ये हानिकारक ॲप किंवा फाइल्स डाउनलोड होऊन बँकिंग माहिती चोरीला जाऊ शकते. जर दुर्दैवाने ऑनलाईन फसवणूक झालीच, तर नागरिकांनी तत्काळ २४ तासांच्या आत जवळच्या पोलीस ठाण्यात तक्रार करावी किंवा १९३० या सायबर क्राईम हेल्पलाइन क्रमांकावर संपर्क साधून आपली नोंदणी करावी, असे आवाहन करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:52 29-08-2026
