सार्वजनिक रस्त्यांवर वाहतूक आणि पादचाऱ्यांना अडथळा निर्माण करणाऱ्या चालकांवर विविध पोलीस ठाण्यांच्या हद्दीत कारवाईचा बडगा
Ratnagiri Traffic Rules Enforcement मोहिमेअंतर्गत सार्वजनिक रस्त्यांवर वाहतुकीस आणि पादचाऱ्यांना अडथळा तसेच धोका निर्माण होईल अशा पद्धतीने वाहने उभी करणाऱ्यांविरोधात रत्नागिरी जिल्हा पोलिसांनी मोठी धडक कारवाई सुरू केली आहे. जिल्ह्यातील विविध पोलीस ठाण्यांच्या हद्दीत सार्वजनिक रस्त्यावर बेकायदेशीर आणि धोकादायक स्थितीत वाहने उभी केल्याप्रकरणी २४ वाहनचालकांवर गुन्हे दाखल करण्यात आले आहेत. रस्त्यांवर बेफिकिरीने वाहने पार्क केल्यामुळे होणारी वाहतूक कोंडी आणि अपघातांचा धोका लक्षात घेता पोलीस प्रशासनाने ही कडक भूमिका घेतली आहे.
Ratnagiri Traffic Rules Enforcement: ग्रामीण आणि तालुका स्तरावरील गुन्ह्यांची नोंद
रत्नागिरी ग्रामीण पोलीस ठाण्याच्या हद्दीत कारवांचीवाडी फाटा ते खेडशी मार्गावर वाहतुकीस अडथळा ठरणाऱ्या चालकांवर कारवाई करण्यात आली असून यामध्ये विजय यशवंत पवार, विजय यशवंत रेवाळे, सचिन प्रदीप साळुंखे आणि रंजित रघुनाथ लवंदे यांच्याविरोधात गुन्हे नोंदवण्यात आले आहेत. लांजा तालुक्यात मुंबई-गोवा महामार्गावरील एसटी स्टँड परिसर, जावडे फाटा आणि सोनाई हॉस्पिटलसमोर वाहने उभी करणाऱ्या गौरव हेमंत आग्रे, कल्पेश अरुण राणे, अल्ताफ मुराद ठाकूर, निखिल अनंत लिंगायत आणि योगेश किशोर पांचाळ यांच्यावर कायदेशीर कारवाई झाली आहे. खेड शहरात खेड-दापोली मार्गावर दुचाकी मध्यभागी उभी केल्याप्रकरणी क्षितिज संजय दरेकर याच्यावर गुन्हा दाखल करण्यात आला.
हायवे व राज्य मार्गांवर अवजड आणि कमर्शियल वाहनांवर कारवाई
अलोरे-शिरगाव पोलिसांच्या हद्दीत पिंपळी बुद्रुक येथील निसर्ग हॉटेलसमोर गुहागर-विजापूर राज्य महामार्गावर अवजड वाहने उभी करून अडथळा निर्माण केल्याप्रकरणी कर्नाटकातील सरदार लालू चव्हाण आणि अमेश लक्ष्मण राठोड यांच्यावर गुन्हे नोंदवण्यात आले. चिपळूणमध्ये बहादूरशेख नाका येथील साई प्लाझासमोर टाटा मॅजिक वाहन उभे केल्याप्रकरणी संतोष परशुराम शिंदे याच्यावर तर संगमेश्वर बाजारपेठ व संगमेश्वर-देवरूख मार्गावर नीलेश नामदेव चव्हाण, अय्य सरदार कतनळी आणि दिनेश मधुकर कांचले यांच्यावर कारवाई झाली.
रत्नागिरी शहर, जयगड सागरी आणि राजापूर पोलीस ठाण्यातील गुन्हे
रत्नागिरी शहरात तेलीआळी नाका, आठवडा बाजार, जेलनाका, जयस्तंभ, नगर वाचनालय आणि मारुती मंदिर परिसरात अरविंद केशव शिंदे, आदिल इकबाल बहुये, अक्षय मोहन राऊत, रविकांत देवानंद कडपट्टे आणि सागर सुभाष बंदरकर यांच्यावर गुन्हे नोंदवले गेले. जयगड सागरी पोलिसांनी खंडाळा येथील श्रेया हॉटेलसमोर बोलेरो वाहन उभे केल्याप्रकरणी मानाजी सदाशिव चव्हाण यांच्यावर गुन्हा दाखल केला. राजापूर तालुक्यात सोल्ये ते राजापूर रेल्वे स्थानक परिसरातील नो-पार्किंग झोनमध्ये इको वाहन उभे केल्याप्रकरणी इस्माईल जाफर नाईक याच्यावर कारवाई करण्यात आली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:53 29-08-2026
