शेतकर्यांप्रमाणेच मच्छीमार बांधवांना ‘पुण्यश्लोक अहिल्यादेवी होळकर कर्जमुक्ती योजना २०२६’ चा लाभ देण्याची वाशिष्ठी मच्छीमार संस्थेची मागणी
चिपळूण:
Fishermen Loan Waiver Demand Shekhar Nikam आणि कोकणातील पारंपरिक मच्छीमारांच्या आर्थिक संकटाची दखल घेत चिपळूणचे आमदार शेखर निकम यांनी मत्स्य व्यवसाय व बंदरे विकास मंत्री नितेश राणे यांच्याकडे निवेदनाद्वारे एक महत्त्वपूर्ण मागणी केली आहे. पारंपरिक मासेमारी व्यवसायावर उदरनिर्वाह करणाऱ्या मच्छीमारांना विविध नैसर्गिक व मानवनिर्मित संकटांमुळे मोठ्या आर्थिक अडचणींचा सामना करावा लागत आहे. त्यामुळे शेतकर्यांप्रमाणेच मच्छीमारांनाही ‘पुण्यश्लोक अहिल्यादेवी होळकर शेतकरी कर्जमुक्ती योजना २०२६’ मध्ये समाविष्ट करून कर्जमाफीचा लाभ द्यावा, अशी मागणी करण्यात आली आहे.
वाशिष्ठी मच्छीमार व्यवसायिक सहकारी संस्था, चिवेली यांच्या वतीने आमदार शेखर निकम यांनी मंत्री नितेश राणे यांची भेट घेऊन हे निवेदन सुपूर्द केले. यावेळी चिपळूण माजी पंचायत समिती सदस्य पांडुरंग माळी, वाशिष्ठी मच्छीमार व्यावसायिक सहकारी संस्था, चिवेलीचे चेअरमन प्रभाकर सैतवडेकर, विलास वाजे, गणेश साबळे आदी मान्यवर उपस्थित होते.
मासेमारीसमोरील गंभीर समस्या अन् वाढता कर्जबाजारीपणा
Fishermen Loan Waiver Demand Shekhar Nikam आणि मच्छीमारांसमोरील आव्हाने
समुद्र तसेच खाड्यांमध्ये विविध पद्धतीने पारंपरिक मासेमारी करून मच्छीमार आपल्या कुटुंबाचा उदरनिर्वाह करतात. मात्र, गेल्या काही काळात मासेमारी व्यवसायासमोर अनेक गंभीर समस्या निर्माण झाल्या आहेत:
- एलईडी मासेमारी आणि डिझेल पुरवठा: बेकायदेशीर एलईडी मासेमारीमुळे मासळीचा दुष्काळ जाणवत असून डिझेल पुरवठ्यातील अडचणींमुळे खर्च वाढला आहे.
- जलप्रदूषण आणि वाळू उपसा: खाडी परिसरातील जलप्रदूषण आणि अनधिकृत वाळू उपशामुळे मासेमारीवर अत्यंत प्रतिकूल परिणाम झाला आहे.
- गाळाची समस्या: गोवळकोट ते करंबवणे खाडीतील साचलेल्या गाळामुळे नौका वहनामध्ये अडथळे निर्माण होत आहेत.
या सर्व कारणांमुळे मासेमारीचे उत्पन्न घटल्याने अनेक मच्छीमार कर्जबाजारी झाले असून त्यांच्या कुटुंबाच्या उदरनिर्वाहाचा प्रश्न गंभीर बनला आहे. आर्थिक संकटामुळे शेतकर्यांप्रमाणेच मच्छीमारांवरही टोकाचे पाऊल उचलण्याची वेळ येऊ शकते, अशी चिंता या निवेदनातून व्यक्त करण्यात आली आहे.
मुख्यमंत्री अन् उपमुख्यमंत्र्यांना निवेदनाच्या प्रती रवाना
या निवेदनाच्या प्रती मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, उद्योगमंत्री तथा पालकमंत्री उदय सामंत, राज्य महसूल मंत्री योगेश कदम आणि आमदार भास्कर जाधव यांना माहितीसाठी पाठवण्यात आल्या आहेत.
पुण्यश्लोक अहिल्याबाई होळकर शेतकरी कर्जमाफी योजना २०२६ मध्ये मच्छीमार बांधवांचा समावेश करावा, तसेच गोवळकोट ते करंबवणे खाडीतील साचलेला गाळ तात्काळ काढून द्यावा, या मागण्यांवर मंत्री नितेश राणे यांच्यासोबत सकारात्मक चर्चा झाल्याचे आमदार शेखर निकम यांनी सांगितले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:30 05-09-2026
