४ दिवसांत नवी नियमावली; आरोग्यमंत्री प्रकाश आबिटकर यांचे आदेश
कोल्हापूर / छत्रपती संभाजीनगर:
Hospital Fire Audit आणि रुग्णालयांमधील संभाव्य आगीच्या दुर्घटना रोखण्याच्या दृष्टीने राज्य सरकारने मोठा निर्णय घेतला आहे. महाराष्ट्रातील सर्व शासकीय आणि खाजगी रुग्णालयांचे फायर ऑडिट करण्याचे निर्देश राज्याचे आरोग्यमंत्री प्रकाश आबिटकर यांनी शुक्रवारी दिले आहेत. यासंदर्भात पुढील चार दिवसांत एक सर्वकष मार्गदर्शक सूचनांची नियमावली (SOP) जाहीर केली जाणार असल्याचे त्यांनी स्पष्ट केले. छत्रपती संभाजीनगर येथे शुक्रवारी पहाटे एशियन हॉस्पिटलमध्ये लागलेली आग आणि काही दिवसांपूर्वी अमरावती येथील रुग्णालयात लागलेल्या आगीत नवजात बालकांचा झालेला मृत्यू, या गंभीर घटनांच्या पार्श्वभूमीवर कोल्हापूर येथील जिल्हाधिकारी कार्यालयात पत्रकारांशी बोलताना आरोग्यमंत्र्यांनी ही महत्त्वपूर्ण माहिती दिली.
रुग्णालयांची सुरक्षा यंत्रणा तपासण्यासाठी दर सहा महिन्यांनी होणार तपासणी
Hospital Fire Audit आणि सुरक्षेच्या उपाययोजना
छत्रपती संभाजीनगर येथील एशियन हॉस्पिटलमध्ये शुक्रवारी पहाटे आग लागल्याची घटना घडली. तेथील कर्मचाऱ्यांनी दाखवलेल्या प्रसंगवधानामुळे सुदैवाने कोणतीही जीवितहानी झाली नाही. या घटनेचा संदर्भ देत आरोग्यमंत्री आबिटकर म्हणाले की, अमरावती येथील घटनेनंतर एका बाजूला कारवाई होईलच, परंतु यापुढे राज्यातील सर्वच शासकीय आणि खाजगी रुग्णालयांमध्ये फायर ऑडिट आणि प्रतिबंधात्मक उपाययोजना करण्याबाबत संबंधित यंत्रणांना कडक सूचना देण्यात आल्या आहेत. पुढील चार दिवसांत जारी होणाऱ्या ‘एसओपी’नुसार सर्व नियमांचे पालन होते की नाही, फायर ऑडिट केले की नाही, या सर्व बाबींची नोंद घेतली जाईल. रुग्णालयांच्या सुरक्षिततेसाठी सर्व यंत्रणांची दर सहा महिन्यांनी आरोग्य विभागाकडून नियमित तपासणी केली जाईल, असेही त्यांनी नमूद केले.
राजकीय व इतर विषयांवर आरोग्यमंत्र्यांची भूमिका
पत्रकार परिषदेत कायदा, सुव्यवस्थेबाबत खासदार संजय राऊत यांनी केलेल्या आरोपांवर बोलताना आबिटकर म्हणाले की, राज्याचे गृहमंत्री देवेंद्र फडणवीस हे उपमुख्यमंत्रीसुद्धा आहेत आणि ते अत्यंत सक्षमपणे काम करत आहेत. यापूर्वीही त्यांनी पाच वर्षे महाराष्ट्राच्या गृहमंत्रीपदाचे नेतृत्व प्रभावीपणे केले आहे. याशिवाय शक्तीपीठ महामार्गाबाबत बोलताना, शेतकऱ्यांना विश्वासात घेऊनच कोणताही प्रकल्प पुढे नेला पाहिजे, असे सांगत सर्वांनी संयम राखून काम करण्याचे आवाहन त्यांनी केले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:49 05-09-2026
