तब्बल १६ वर्षांनंतर भारताचा पदकाचा दुष्काळ संपला; जपानच्या मिझुहो पार्क स्टेडियमवर सीमाने ३२:५०.०५ सेकंदासह रचला इतिहास
Asian Games 2026 Seema Kumari: २०२६ च्या आशियाई क्रीडा स्पर्धेत भारताच्या शिरपेचात मानाचा तुरा रोवणारी बातमी समोर आली आहे. भारताची सुपुत्री सीमा कुमारी हिने गुरुवारी महिलांच्या १० हजार मीटर धावण्याच्या शर्यतीत उत्कृष्ट कामगिरी करत कांस्यपदक पटकावले आहे. जपान येथील मिझुहो पार्क ऍथलेटिक स्टेडियमवर झालेल्या या अंतिम सामन्यात २५ वर्षीय सीमा कुमारीने ३२:५०.०५ सेकंदाची वेळ नोंदवून तिसरे स्थान मिळवले.
तब्बल १६ वर्षांनंतर संपला पदकाचा दुष्काळ
१० हजार मीटर शर्यतीत भारताने तब्बल १६ वर्षांनंतर पदक जिंकले आहे. यापूर्वी २०१० मधील आशियाई क्रीडा स्पर्धेत भारताच्या प्रीजा श्रीधरनने सुवर्ण तर कविता राऊतने रौप्यपदक जिंकले होते. त्यानंतर आता सीमा कुमारी या स्पर्धेत पदक जिंकणारी तिसरी भारतीय महिला खेळाडू ठरली आहे. या शर्यतीत बहरीनच्या विनफ्रेड यावीने ३२:३९.१८ सेकंदासह सुवर्ण, तर जपानच्या नोझोमी तनाकाने ३२:४१.५४ सेकंदासह रौप्यपदक पटकावले.
अंतिम फेरीत सीमा कुमारीची थरारक मुसंडी आणि Asian Games 2026 Seema Kumari
हिमाचल प्रदेशातील चंबा येथील रहिवासी असलेल्या सीमा कुमारीने अंतिम फेरीत दमदार सुरुवात केली होती. तिने पहिले २,००० मीटर अंतर अवघ्या ६:३६.१३ सेकंदात पार करत आघाडी घेतली होती. मधल्या टप्प्यात तिची घसरण चौथ्या स्थानावर झाल्याने पदक हुकते की काय अशी स्थिती निर्माण झाली होती. परंतु, शेवटच्या १,००० मीटरच्या टप्प्यात सीमाने अभूतपूर्व पुनरागमन करत तिसरे स्थान निश्चित केले. सीमाच्या या ऐतिहासिक यशाबद्दल राष्ट्रपती द्रौपदी मुर्मू आणि पंतप्रधान नरेंद्र मोदी यांनी तिचे विशेष कौतुक केले आहे.
पदकतालिकेत भारत १५ व्या स्थानावर
सीमा कुमारी भारतासाठी १६ वी पदकविजेती ठरली. तिच्या या पदकानंतर भारतीय ४x४०० मीटर रिले संघाने रौप्यपदक मिळवत भारताच्या खात्यात १७ वे पदक जमा केले. सध्या भारत १७ पदकांसह पदकतालिकेत १५ व्या स्थानावर आहे. आतापर्यंत भारताला एकमेव सुवर्णपदक महिला क्रिकेट संघाने मिळवून दिले आहे.
