झाडे तोडण्याच्या कामासाठी आला होता दापोलीत; ‘कावीळ झाली असून गावी जातो’ सांगून निघालेला इसम गायब
दापोली : झाडे तोडण्याच्या मजुरीच्या कामासाठी पालघरवरून दापोली येथे आलेल्या एका ३९ वर्षीय कामगाराचे अज्ञात कारणासाठी अपहरण झाल्याची धक्कादायक घटना समोर आली आहे. आजारी असल्याने गावी जात असल्याचे सांगून निघालेला हा कामगार पालघर येथील आपल्या घरी पोहोचलाच नाही. सर्वत्र शोध घेऊनही कोणताही ठावठिकाणा न लागल्याने, अखेर याप्रकरणी दापोली पोलीस ठाण्यात अज्ञात इसमाविरुद्ध भारतीय न्याय संहितेनुसार अपहरणाचा गुन्हा दाखल करण्यात आला आहे.
आजारी असल्याचे सांगून दापोलीतून निघाले :
पोलिसांकडून मिळालेल्या प्राथमिक माहितीनुसार, अशोक केवजी फडवळे (वय ३९ वर्षे, रा. पिंपळकडा, सारसुन, ता. जव्हार, जि. पालघर) हे दापोली तालुक्यातील ताडील बागवाडी येथे झाडे तोडण्याच्या मजुरीच्या कामासाठी आले होते. मंगळवार, दिनांक २९ सप्टेंबर २०२६ रोजी सकाळी ११:३० वाजण्याच्या सुमारास, “मला कावीळ झाली असून मी उपचारासाठी पालघर येथील मूळ गावी जात आहे,” असे सांगून ते ताडील बागवाडी येथून निघाले.
गावी पोहोचलेच नाहीत; नातेवाईकांचा शोध निष्फळ :
दापोलीतून निघालेले अशोक फडवळे हे जव्हार येथील आपल्या घरी पोहोचलेच नाहीत. अनेक दिवस उलटूनही ते घरी न आल्याने त्यांच्या कुटुंबीयांनी दापोली ते जव्हार दरम्यान सर्व नातेवाईक, ओळखीचे लोक तसेच आजूबाजूच्या परिसरात कसून शोध घेतला. मात्र त्यांचा कुठेही थांगपत्ता लागला नाही. त्यामुळे अज्ञात कारणासाठी कोणीतरी अज्ञात इसमाने त्यांना गैरकायदेशीरपणे डांबून ठेवण्याच्या उद्देशाने पळवून नेल्याचा संशय व्यक्त करण्यात आला.
पत्नीच्या फिर्यादीवरून पोलिसांत गुन्हा दाखल :
आपले पती सुरक्षित घरी न परतल्याने अखेर अपहृत कामगाराच्या पत्नी जयवंती अशोक फडवळे (वय ३७ वर्षे) यांनी दापोली पोलीस ठाणे गाठून तक्रार दिली. या फिर्यादीवरून दापोली पोलिसांनी रविवार, ४ ऑक्टोबर २०२६ रोजी दुपारी अज्ञात आरोपीविरुद्ध गु.र.नं. २१२/२०२६, भारतीय न्याय संहिता (BNS) २०२३ चे कलम १४०(३) अन्वये अपहरणाचा गुन्हा नोंदवला आहे. या बेपत्ता कामगाराचा कसून शोध दापोली पोलीस घेत आहेत.
