शहर पोलिसांच्या रात्रगस्ती दरम्यान कारवाई; पोलिसांकडून एनडीपीएस कायद्यानुसार गुन्हा दाखल
Ratnagiri Ganja Case: (रत्नागिरी, ११ ऑक्टोबर) येथील उद्यमनगर परिसरातील महिला हॉस्पिटलजवळ बेकायदेशीरपणे गांजा बाळगल्याप्रकरणी रत्नागिरी शहर पोलिसांनी तिघा तरुणांना रंगेहात अटक केली आहे. पोलिसांनी संशयितांकडून गांजा, एक ऑटो रिक्षा आणि एक दुचाकी असा एकूण ४ लाख २५ हजार रुपये किमतीचा मुद्देमाल जप्त केला आहे.
रात्रगस्तीदरम्यान पोलिसांची धडक कारवाई
शनिवारी मध्यरात्रीच्या सुमारास रत्नागिरी शहर पोलीस ठाण्याचे हेडकॉन्स्टेबल दिनेश पांडुरंग आखाडे हे महिला रुग्णालय ते चंपक मैदान या परिसरात रात्रगस्त घालत होते. गस्तीदरम्यान तालुका लघुपशुवैद्यकीय चिकित्सालयाजवळ तिघे तरुण संशयास्पद हालचाली करताना पोलिसांच्या नजरेस पडले. पोलिसांनी तत्काळ त्यांना ताब्यात घेऊन चौकशी केली व त्यांची झडती घेतली.
जप्त केलेला मुद्देमाल आणि आरोपींची नावे
झडतीदरम्यान तिन्ही तरुणांकडे विक्री करण्याच्या उद्देशाने ठेवलेला अमली पदार्थ (गांजा) आणि वाहने आढळून आली. पोलिसांनी खालील तिघांवर कारवाई करत त्यांना अटक केली:
साहिल समीर सोलकर (वय २७, रा. कोकण नगर, रत्नागिरी)
सुफियान अनिस गुहागरकर (वय २५, मूळ रा. पडवे-दखनी मोहल्ला, ता. गुहागर; सध्या रा. आझाद नगर, कोकण नगर, रत्नागिरी)
यशराज राजेश देसाई (वय २४, रा. गणेश कॉलनी, हातखंबा, रत्नागिरी)
*
कारवाईत जप्त करण्यात आलेला मुद्देमाल:*
अमली पदार्थ: ३४.५० ग्रॅम गांजा (किंमत सुमारे १ लाख २५ हजार रुपये)
वाहने: बजाज कंपनीची मॅक्सिमा रिक्षा (किंमत १ लाख ७५ हजार रुपये) आणि सुझुकी कंपनीची दुचाकी (किंमत १ लाख २५ हजार रुपये).
रत्नागिरी शहर पोलिसांत गुन्हा दाखल
विक्रीच्या उद्देशाने बेकायदेशीर अमली पदार्थ बाळगल्याचे निष्पन्न झाल्याने रत्नागिरी शहर पोलीस ठाण्यात या तिघांविरोधात अमली पदार्थ विरोधी कायद्यानुसार (NDPS Act) गुन्हा दाखल करण्यात आला आहे. शहर पोलीस या प्रकरणाचा पुढील सखोल तपास करत असून, हा गांजा त्यांनी कोठून आणला होता आणि तो कोणाला विक्री केला जाणार होता, याचा शोध घेतला जात आहे.
