पारंपरिक मच्छिमार नेत्याने प्रशासनाला मोफत नौका देण्याची दर्शवली तयारी; कारवाईची मागणी
LED Fishing Enforcement च्या कारवाईसाठी रत्नागिरीच्या समुद्रात मोठी अडचण निर्माण झाली आहे. समुद्रातील बेकायदेशीर एलईडी प्रकाशातील मासेमारी करणाऱ्या नौकांना पकडण्यासाठी सहाय्यक मत्स्य व्यवसाय विभागाकडे स्वतःची गस्ती नौकाच नसल्याने गस्ती पथक हतबल झाले आहे. अशा बिकट परिस्थितीत, नवीन गस्ती नौका मिळेपर्यंत आपल्या दोन नौकांपैकी एक नौका विनामोबदला देण्याची तयारी पारंपारिक शाश्वत मच्छिमार हक्क संघाचे अध्यक्ष रणजीत उर्फ छोट्या भाटकर यांनी दर्शवली आहे. तसेच अनधिकृत मासेमारी करणाऱ्या नौकांवर कठोर कारवाई करण्यासाठी पारंपरिक मच्छिमारही गस्ती पथकासोबत खांद्याला खांदा लावून येण्यास तयार असल्याचे त्यांनी स्पष्ट केले आहे.
एलईडी आणि पर्ससीन नेट मासेमारीमुळे पारंपारिक मच्छिमार संकटात
रत्नागिरी जिल्ह्याच्या समुद्रात बेकायदेशीरपणे एलईडी मासेमारी करून पारंपारिक मच्छिमारांच्या हक्काची मासळी मोठ्या प्रमाणावर फस्त केली जात आहे. या अवैध मासेमारीसंदर्भात वारंवार तक्रारी झाल्यानंतर मत्स्य व्यवसाय विभागाचे अतिरिक्त सहआयुक्त महेश देवरे आणि उपायुक्त नागनाथ भादुले यांनी स्वतंत्र पथक गठीत करून नियमित कारवाई करण्याचे आदेश दिले होते. परंतु, एलईडी मासेमारी करणाऱ्या नौका पकडण्यासाठी रात्रीच्या वेळी समुद्रात गस्ती नौकेने जावे लागते. सहाय्यक मत्स्य व्यवसाय विभागाकडे स्वतःची गस्ती नौकाच उपलब्ध नसल्यामुळे नेमकी कारवाई कशी करावी, असा प्रश्न यंत्रणेसमोर उभा ठाकला आहे.
गस्ती नौकेचा प्रश्न आणि सुरक्षेचा मुद्दा
सहाय्यक मत्स्य व्यवसाय विभागाकडे पूर्वी असलेली ‘शारदा’ नावाची गस्ती नौका तांत्रिक बिघाडामुळे आणि इतर कारणांमुळे परत करण्यात आली होती. या नौकेचा वेग ताशी केवळ ९ ते १० नॉटीकल मैल इतका कमी होता, शिवाय समुद्रातील लाटांच्या माऱ्यामुळे हेलकावे खाणाऱ्या या नौकेमुळे गस्ती पथकातील कर्मचाऱ्यांना शारीरिक त्रासाचा सामना करावा लागत होता. त्यानंतर जुनी ‘रामभद्रा’ गस्ती नौका देण्याबाबत आयुक्तालयाकडून हालचाली सुरू झाल्या, पण ही नौका फायबरची असल्याने परप्रांतीय अवाढव्य लोखंडी नौकांजवळ जाणे अतिशय धोकादायक आणि असुरक्षित ठरत होते. त्यामुळे प्रशासनासमोर नौकेचा मोठा पेच निर्माण झाला आहे.
बेकायदेशीर मासेमारी विरोधात मच्छिमारांचा पुढाकार
रत्नागिरीच्या समुद्रात एलईडी मासेमारीसह परवानगी नसलेल्या राज्याच्या हद्दीत पर्ससीन नेट आणि मिनी पर्ससीन नेटद्वारेही अनधिकृत मासेमारी सुरू आहे. या सर्व बेकायदेशीर प्रकारांना आळा घालण्यासाठी गस्ती पथकाला आपली स्वतःची मासेमारी नौका पूर्णपणे मोफत वापरण्यास देण्याची तयारी रणजीत भाटकर यांनी दाखवली आहे. शासनाने या अवैध मासेमारीवर १०० टक्के कडक कारवाई करून सामान्य मच्छिमारांना न्याय द्यावा, हीच आपली एकमेव अपेक्षा असल्याचे त्यांनी म्हटले आहे.
